Keçid linkləri

2016, 05 Dekabr, Bazar ertəsi, Bakı vaxtı 00:37

Sən güləndə mən bütün dini kitabları yandırmaq istəyirəm ürəyimdə...


İllüstrasiya fotosu

İllüstrasiya fotosu

-

Dilqəm

5-ci sinif uşağı

bir az baxışın olsa yadımda,

bir az gülüşün,

saçlarından bir az olsa əllərimdə,

əllərin bir də, əllərimdə üşüsə bir az mənə bəsdi əslində,

mən əslində səni sevməmişəm hələ,

ibadətlə məşğulam, şeir yazıram sənsizliyə beşinci sinif uşağı kimi..

və o uşaq kimi mən də allahın kişi olduğuna inanıram

tərslikdən, təsadüfən, ya da səhvən

gülməlidir, hə?

gül, əzizim, o uşaq kimi gül sən də,

sən güləndə mən bütün dini kitabları yandırmaq istəyirəm ürəyimdə..

belə qorxuram yoxsa, beşinci sinif uşağı kimi qorxuram ki, yanaram birdən

və birdən saçların düşər əllərimdən..

saçların demişkən, yuxuda sanki daha qısa görünür həmişəkindən..

..yoxsa nədən qorxacam ki?

sevərəm səni də ürəyimdə,

beşinci sinif uşağı kimi səssiz, sakit, öz içimdə..

amma əslində mən səni sevməmişəm hələ,

ibadətlə məşğulam, şeir yazıram sənsizliyə..

gülməlidir, hə? gül, əzizim, gül,

sən güləndə mən bütün din adamlarını öldürmək istəyirəm ürəyimdə,

amma qorxuram, qorxuram ki, yanaram birdən

və birdən saçların düşər əllərimdən..

saçların demişkən, içimdə sanki daha buruq-buruq görünürlər..

..yoxsa nədən qorxuram ki?

sevərəm səni də elə bu gündən, səhər tezdən, səssiz, sakit, öz içimdə

amma əslində mən səni sevməmişəm hələ,

ibadətlə məşğulam, şeir yazıram sənsizliyə..

sənsizlik demişkən, payızda daha çətindi sanki,

daha ölümcüldür ele-bil payızdakı yoxluğun,

mən səni payızda sevməmişəm hələ..

səndən danışıram

səndən danışıram

tanımadığım insanlara,

sən gedəndə

arxandan

unutduğun gülüşünü

başa salmaq çətin gəlir,

ölüm çıxıb qabağıma səni danışır elə-bil,

sən gedəndə

arxana belə baxmadığını

başa sala bilmir,

ölüm səndən asan gəlir mənə..

səndən danışıram

tanıdım, tanımadım, bilmirəm,

sən gedəndə

nə rəng idi paltarın?

yadıma sala bilmirəm..

ölüm kəsib qabağımı səni soruşur elə-bil,

sən gedəndə çoxdan idi,

ölümə də çox var idi,

amma indi

sən ölümdən uzaqdasan mənə..

səndən danışıram

danışıram ki, rahat olum,

sən gəlsən də

bundan sonra mənə rahat olmaz ölüm,

amma gəl, gəl səsini eşidim,

gəl bir az da sən danış,

danış ki, heç olmamısan,

gəl danış ki, heç olmasa səssiz olmasın ölümüm..

ölüm sənsiz kardı mənə..

səndən danışıram

öz-özümə..

danışıram ki, gələcəksən,

öz-özümə ölmək istəmirəm,

sən mənim qurtuluş günümsən bəlkə də..

avqustun axırı

tanımadığın bir sevgilinin ölümü kimidir yalnızlıq,

saçlarını sığallamaq, boynunu öpməkdir darıxmaq

tanımadığın bir sevgilinin cansız bədənini qucaqlamaq kimidir,

bər-bərk sarılmaq yazısı silinmiş qəbir daşlarına,

tozunu təmizləmək, sığallamaq torpağını,

dua etmək boşluğuna lal olmaqdan betərdi..

bir sevgili ölməsin gərək avqustun axırında,

payıza bir addım qalmış

çıxıb getməsin gərək heç nə olmamış kimi,

gül kimi yaşamaq varkən,

getməsin gərək

bəhanəsiz bir ölüm kimi..

Samsun, 2014.

Günün bütün mövzuları

XS
SM
MD
LG