Sentyabrın 25-də Azərbaycanın Xarici İşlər naziri Elmar Məmmədyarovun BMT Baş Assambleyasının 61-ci sessiyasında çıxışı gözlənilir. Bu barədə «Azadlıq» radiosuna məlumat verən XİN rəsmisi Tahir Tağızadənin sözlərinə görə, nazirin çıxışı üç istiqamətdə olacaq: GUAM ərazisində «dondurulmuş» münaqişələr, BMT-də islahatlar və sivilizasiyalararası münasibətlər.
Politoloq Vəfa Quluzadə hesab edir ki, əgər digər ölkələrin də nümayəndələri Gürcüstan prezidenti Mixail Saakaşvili kimi dondurulmuş münaqişələrə görə günahkarların adını açıq şəkildə bayan eləsə bundan hansısa bir nəticə gözləmək mümkündür. Politoloqa görə, əslində BMT Rusiyanın bu məsələlərdə adının çəkilməsində maraqlıdır.
YAP-çı deputat Aydın Mirzəzadə bir qədər fərqli fikirdədir. O, hesab edir ki, əsas məsələ Dağlıq Qarabağ münaqişəsinin BMT-də müzakirəsi yox, beynəlxalq ictimaiyyətin məsələyə ciddi diqqətindən gedir. Azərbaycanın BMT-yə üzv olduğu 15 il müddətində torpaqlarının Ermənistan tərəfindən işğal olunmasıyla bağlı məsələlərin müzakirə edilmədiyini deyən politoloqa görə, indi Ermənistan həmin müzakirələrdə səslənən suallara cavab verməli olacaq. O ki, qaldı BMT Baş Assambleyasının 61-ci sessiyasında «dondurulmuş» münaqişələrlə bağlı müzakirələrdə Rusiyanın adının birbaşa çəkilməsinə Aydın Mirzəzadə hesab edir ki, belə bir üsulla münaqişələrin həllinə nail olmaq xeyli çətindir. Digər tərəfdən cənab Mirzəzadə yada salır ki, Rusiya Azərbaycanın ərazi bütövlüyünü tanıyır və Azərbaycan-Rusiya münasibətlərə xələl gətirəcək hər hansı bir addım atılmamalıdır. Onun qənaətincə, Dağlıq Qarabağ münaqişəsinin həlli ilə bağlı beynəlxalq hüququn məzmununa və məğzinə uyğun addımlar atılmalıdır.
