Sentyabrın 23-də Daxili İşlər Nazirliyi Baş Dövlət Yol Polisi İdarəsinə 200 ədəd «BMW 320» markalı avtomaşın təqdim edib. Bundan sonra yol patrul xidmətləri bu maşınlarla həyata keçiriləcək.
Təqdimetmə mərasimində Daxili İşlər naziri Ramil Usubov dedi ki, il ərzində avtomobil qəzaları nəticəsində 500-700, bəzən bundan da çox adam həlak olur. O, avtomobillərin sayının artması ilə yol hərəkətində problemlər yarandığını, problemlərin aradan qaldırılması üçün yeni yollar tikildiyini, körpülər və piyada keçidlərinin inşa olunduğunu bildirdi.
Baş Dövlət Yol Polisi idarəsinin rəisi Ramiz Zeynalov isə dedi ki, Yol Polisinin işini yüksəltmək üçün hərəkətə videonəzarət qurğuları, avtomobilləri diaqnostikadan keçirmək üçün müasir aparatlar alınıb.