Tələbə Qəbulu üzrə Dövlət Komissiyası (TQDK) ali məktəblərin magistratura pilləsinə qəbulda boş qalan yerlərə əlavə yerləşdirilmə aparılması üçün ərizə qəbuluna başlayır. Bu ilin iyul ayında keçirilən imtahanda 50-dən yuxarı bal toplayan bakalavrlar boş yerləri tutmaq üçün sentyabrın 1-dən 5-dək TQDK-na müraciət edə bilərlər. Komissiyanın ictimaiyyətlə əlaqələr şöbəsinin əməkdaşı Elnur Nağızadənin sözlərinə görə, humanitar sahədə boş yer qalmayıb. Magistraturaya əlavə yerləşdirmə əsasən neft-qaz və təbiət elmlər sahəsindəki ixtisaslar üzrə aparılacaq. Ali məktəblərdə boş qalan yerlərin siyahısının sentyabrın 2-də açıqlanması nəzərdə tutulur.
Magistraturaya imtahan bu ilin iyul ayının 23-də keçirilib, 4360 magistr yeri uğrunda 10343 bakalavr təhsilli tələbə mübarizə aparıb və onlardan 2701-i ölkənin ali məktəblərinin magistr pilləsində təhsil almaq şansı qazanıb. 1500-dən çox magistr yeri isə boş qalmışdı.