Dörd müxalifət partiyasının birləşdiyi «Azadlıq» bloku və hüquq müdafiəçiləri söz azadlığı uğrunda birgə kampaniyaya başlayır. Sentyabrın 1-də blokun, hüquq müdafiəçilərinin və beynəlxalq qurumların iştirakı ilə keçirilən dəyirmi masada Sülh və Demokratiya İnstitutunun direktoru Leyla Yunus müxalifət mətbuatına təzyiqlərin gücləndiyini bildirdi. Hüquq müdafiəçisinin qənaətincə, əgər yaxın günlərdə genişmiqyaslı kampaniya başlamasa, söz azadlığı daha da məhdudlaşacaq. Çünki artıq bir jurnalist öldürülüb, biri şikəst olunub, başqaları isə həbs edilib: «Biz yaxınlarda mətbuatın müdafiəsinə qalxmasaq, ölkədəki digər problemlər haqqında yalnız mətbəxdə danışa biləcəyik. Və onda deyəcəyik ki, Azərbaycanda yaşamaq necə də çətindir».
Azərbaycanda söz azadlığı ilə bağlı vəziyyətin pisləşdiyini beynəlxalq qurumlar da bildirir. Mərkəzi Nyu-Yorkda yerləşən Jurnalistləri Müdafiə Komitəsinin Avropa və Orta Asiya proqramı üzrə əlaqələndiricisi Nina Oqnyanova «Azadlıq» radiosuna açıqlamasında bildirib ki, Azərbaycanda jurnalistlər tənqidi yazılarına görə, cinayət məsuliyyətinə cəlb olunur. AŞ PA-nın Azərbaycan üzrə həmməruzəçisi Andres Herkelsə ölkədə söz azadlığının durumunu Belorus ilə müqayisə edir.