Hüquq müdafiəçiləri ölkə prezidentinə, Ədliyyə Nazirliyinə və Beynəlxalq Qırmızı Xaç Cəmiyyətinə Rasim Əkbərovun azadlığa buraxılması və müalicəsinin ev şəraitində aparılmasıyla bağlı müraciət göndərəcəklərini deyirlər.
Həbsxananın baş həkimi Əbülfəz Əhmədov isə «Azadlıq» radiosuna deyib ki, Rasim Əkbərov müxtəlif xəstəliklərdən əziyyət çəkir və hazırda onun vəziyyəti orta stabildir. Cənab Əhmədovun sözlərinə görə, onu cəzaçəkmə müəssisələrinin mərkəzi xəstəxanasında müalicəyə göndərsələr də, yazılı şəkildə bundan imtina edib. Sabiq briqada komandirinin neçə müddətdən bəri əsəbi vəziyyətdə olduğunu deyən həkimin sözlərinə görə, o, hər dəfə haqsız yerə həbs olunduğunu iddia edib azad olunmasını istəyir.
Rasim Əkbərovun qardaşı Rəfael Əkbərovun dediyinə görəsə, onun azadlığa buraxılması ilə bağlı indiyə qədər prezidentə və onun xanımına bir neçə dəfə müraciət ediblər. Bir həftə əvvəl Rasim Əkbərovla görüşdüyünü bildirən Rəfael Əkbərov son vaxtlar qardaşının səhhətində ciddi problemlərin yarandığını deyir.
Rasim Əkbərov 2000-ci il fevralın 8-də həbs edilib. Dövlət çevrilişinə cəhddə ittiham olunan keçmiş briqada komandiri 15 il müddətinə azadlıqdan məhrum edilib.
