«Bakı-Xəbər» qəzetinin əməkdaşı iddia edir ki, rəsmi Moskva indiki Aərbaycan hakimiyyətinin alternativinin də meydana çıxa biləcəyinin qaçılmaz olduğunu yaxşı başa düşür və bu prosesə müəyyən mənada hazırlıq işləri də görür. Elə bu səbəbdəndir ki, Rusiyanın Azərbaycandakı yeni səfiri Vasili İstratov 2008-ci ildə keçiriləcək prezident seçkilərində İlham Əliyevə alternativ namizədlərin kimlər ola biləcəyi barədə, belə demək mümkünsə, kəşfiyyat işlərinə başlayıb. Müəllifin yazdığına görə, Rusiya siyasi dairələrinin fikrincə, əgər Azərbaycanda normal demokratik seçkilər keçirilməsə, mövcud hakimiyyət daxilində prezidentlik iddiasına düşən hər hansı bir şəxsin 2008-ci ildə sürpriz yaradacağı istisna olunmur. Bu sürprizin isə ən müxtəlif yolla, hətta hakimiyyətdaxili qruplaşmaların ziddiyyəti nəticəsində meydana gələ biləcəyi ehtimal edilir. Bütün bunlara görə də, cənab İstratovun tezliklə Azərbaycanın rəsmi şəxsləri, o cümlədən nazirlərlə görüşə başlayacağı gözlənilir.
«Yeni Azərbaycan» qəzetinin əməkdaşı ixracın və idxalın daha sadə üsullarla həyata keçirilməsinə, xarici ticarətin həcminin artmasına, valyuta ehtiyatlarının və iş yerlərinin çoxalmasına gətirib çıxaran azad iqtisadi zonaların Azərbaycanda yaradılmaması səbəblərini araşdırıb. Müəllif yazır ki, azad iqtisadi zonalarda xüsusi gömrük və vergi rejimini tətbiq etmək üçün qanunvericiliyə əlavə və dəyişikliklərin edilməsi vacibdir. Ekspertlərin dediyinə görə, zonaların formalaşdırılmasında ən böyük çətinliklərdən biri də hələlik milli iqtisadiyyatın kifayət qədər rəqabət qabiliyyətinə malik olmamasıdır. Çünki bazarda Azərbaycan iqtisadiyyatında ixracat baxımından ixtisaslaşmış, sənaye təyinatlı məhsulların istehsalı yoxdur. Bu da həmin zonaların formalaşdırılması və genişləndirilməsi baxımından bəzi problemlər yaradır. Eyni zamanda, ekspertlər bu fikri də vurğulayırlar ki, azad iqtisadi zonaların yaradılması ümumilikdə regionun inkişafına səbəb ola, mövcud problemləri aradan qaldıra bilər.
«Xalq Cəbhəsi» qəzetinin əməkdaşı xəbər verir ki, sentyabrın 10-da İran Azərbaycanının şəhərlərində etiraz aksiyaları keçiriləcək. Bu barədə qərarı hərəkatçılar qəbul edib və tələbələr aksiyaya dəstək verəcəklərini bildiriblər. Mitinqlərə çağırış müraciətində bildirilir ki, Azərbaycan milli hərəkatı may ayında keçirilən etiraz aksiyaları zamanı hökumətin zorakılığına məruz qalıb. Ancaq millət öz hüquqlarını əldə etmək uğrunda mübarizədən geri çəkilmək niyyətində deyil. Hərəkatçılar bütün məktəblilər, tələbələr, müəllim və valideynləri dərs ilinin ilk günündə «Ana dilində təhsil!» tələbilə aksiyalarda iştirak etməyə çağırıb.
«Mərkəz» qəzetindəki «Mazut yarımadası» başlıqlı məqalədə bildirilir ki, Abşeronda ətraf mühitin aşırı çirkləndiyi, təbiət və insanın ekoloji partlayış təhlükəsiylə üz-üzə qaldığı bir məqamda, bu partlayışa «dur» deyən bir kimsə gözə dəymir. 4 milyonluq Bakı ətraf yaşayış məntəqələri ilə bərabər kanalizasiyaları Xəzərə və yaxınlıqdakı göllərə axıdır, məişət tullantıları sistemsiz şəkildə bir yerdən başqa yerə daşınır. Paytaxt getdikcə böyüyür. Deməli, çirkab «istehsalı» da artmaqda, göllər böyüməkdə, üfunət, xəstəlik mənbələri güclənməkdədir. Təhlükəni az-çox duyanlar imdad uman nəzərlərini Ekologiya və Təbii Sərvətlər Nazirliyinə yönəldib. Nazirliyin İri Çirkləndirici Obyektlərə Ekoloyi Nəzarət Sektorunun müdiri Mirsalam Qəmbərov isə problemin həllinin onun təmsil etdiyi qurumdan bütünlüklə asılı olmadığını deyir. O, hesab edir ki, çirkli ərazilərin təmizlənməsi barədə təklif ilk növbədə onun sahibindən gəlməlidir.