-
ABŞ-ın sabiq prezidenti Bill Clinton kitab həvəskarıdır.
Onun sevimli kitabları arasında siyasətə, fəlsəfəyə aid kitablarla yanaşı romanlar da var:
Thomas Wolfe. "Bir də evə gedə bilməzsən"
Amerika yazıçısı Thomas Wolfe-un bu romanı ölümündən sonra - 1940-cı ildə nəşr edilib:
Gənc yazar George Webber doğulduğu şəhər haqda bir roman yazır. Qalmaqal yaranır, heç kəs, hətta uşaqlıq dostları da onu anlamır.
İş o yerə çatır ki, onu ölümlə də hədələyirlər. Amerikada özünü yalqız hiss edən yazıçı Avropaya üz tutur.
Burda da onu ixtilaflar, nifrət, faşizmin sürətlə yayılması gerçəkliyi "gözləyir"...
William Styron "Nat Törnerin etirafı"
Nat Turner tarixi şəxsiyyətdir. 1831-ci ildə Virginia-da qulların üsyanına başçılıq edib. amma üsyan yatırılıb, özü də həbs edilib. Yazıçı onu öz romanının qəhrəmanı edib. Anası ağdərili sahibləri tərəfindən zorlanan, özü ilə daim "heyvan kimi" davranılmış Nat ağlara nifrət edir, hətta bu nifrət ağ irqi məhv etmək istəyi dərəcəsinə çatır...
Gabriel Garcia Marquez "Yüz ilin tənhalığı".
Nobel mükafatlı Kolumbiya yazıçısının “Yüz ilin tənhalığı” romanında Buendia nəslinin yüksəlişi, qürubu və məhvi əks olunur. Bu nəslin xarakterik cəhəti onun hər bir nümayəndəsinin taleyində bu və ya digər şəkildə təzahür edən tənhalıqdır. Ailə üzvlərinin bir-birindən aralı düşməsi, onların bir-birini anlaya bilməmələri... Buendiya ailəsinin yaşadığı Makondo kəndi də dünyadan təcrid olunmuş bir yerdir...
Ralph Ellison "Gözəgörünməz adam" (1952)
Roman 20-ci əsrin ilk yarısında Amerikada qaradərililərin irqçilikdən olmazın əziyyətlər çəkməsindən bəhs edir. Onlar üçün cəmiyyətdə mövqe tutmaq yalnız ağ adamların "sayəsində" mümkündür. Gərək onların mənafeyinə xidmət edə, öz irqindən olanlara qarşı çıxasan. Özü də qaradərili olan yazıçı bu romanı bir qaradərili gəncin dilindən yazır. Həmin gənc özünə ona görə "gözəgörünməz" deyir ki, yaşadığı cəmiyyət onu görmək, tanımaq istəmir.
Rövşən
