-
Rusiyanın bir çox ali məktəbləri tezliklə tələbələrə təkcə bakalavriat proqramı əsasında dərs keçəcəklər. «Arqumentı i faktı» qəzeti bu məlumatı Rusiya Federasiyasının təhsil və elm naziri Dmitry Livanov-un açıqladığını bildirir.
Magistratura və aspirantura yalnız bəzi nisbətən güclü universitetlərdə qalacaq. Ölkə rektorlar şurası önündə çıxış edən nazir həmin ali məktəblərin adını çəkməyib.
Dmitry Livanov-un sözlərinə görə, magistratura və aspiranturaların azaldılması Rusiyadakı demoqrafik durumla bağlıdır. 2003-cü ildə orta məktəbləri 1.4 milyon adam bitirdiyi halda indi bu rəqəm 650 min nəfəri aşmır. Nazir hazırda ölkədə 5.7 milyon tələbənin olduğunu, amma bir neçə ildən sonra bu göstəricinin 4 milyona düşəcəyini də diqqətə yetirib və sözlərinə əlavə edib:
«Müəllimlərin sayı xeyli azalacaq, bu üzdən onların maaşını artırmağa tələsmək lazım deyil».