-
Aytən Nəsibbəyli
Dekor
Stəkan doludurmu, boşdurmu, bilməzsən.
Başın hansı tərəfə düşsə,
Oradan baxacaqsan dünyaya.
Eynilə bir balıq kimi.
Eynilə mənim kimi
onda anlayacaqsan
əslində təbiət
sadə detallarla sunur həyatı
sənə,
mənə
anlayana və anlamayana.
Anlamaqsa, əslində, çox asanmış.
Yetər ki sən
suyu bir içimlik,
stəkanı dekor,
balığı isə qızartma etməyəsən.
Cazibə qüvvəsi
Sevdiyimiz qızın
saçını dartıb qaçacaq qədər
sevdi çoxumuz.
Əslində sevgi
şeytanın bir uşağın qəlbinə
sığa bildiyi qədər idi.
Məsum və təhlükəli.
Bilirəm,
ayrı-ayrı yerlərdə dayanmışdıq biz.
Sənə gedən yollar var idi:
Uzun, döngəli.
Mən döngəni döndüm.
Yol bitdi.
O an gözlərindəki təbəssüm nə idi elə?
Məsum və təhlükəli.
Səni göylərdə tapdım mən.
Yerlərdə nə işin var?
Söylə, hörmətli fizik, söylə.
Niyə,
nədən cazibə qüvvəsi yalan olmaz bir dəfə?
İnsan dediyimiz
hər dəfəmi yenik düşər təbiətə?