-
Ukrayna prezidenti Petro Poroshenko xəbərdarlıq edib ki, rusiyayönlü separatçılar Ukrayna vertolyotunu vurandan sonra atəşkəsə son verə bilər. Poroshenko bu bəyanatla iyunun 24-də çıxış edib. Həmin gün Mi-8 hərbi vertolyotu vurulub və 9 ukraynalı hərbçi həlak olub. Hadisə Slavyansk şəhəri yaxınlığında baş verib.
Donetsk aeroportuna və nəzarət məntəqələrinə də hücumlar olub, bir neçə nəfər yaralanıb, bir nəfər ölüb. Separatçıların liderləri iyunun 23-də Poroshenko-nun birtərəfli atəşkəs qərarına razılaşmışdılar.
Atəşkəs iyunun 20-də elan olunub.
Ağ Evin məlumatına görə, ABŞ vitse-prezidenti Joe Biden iyunun 24-də Poroshenko-ya zəng edib, ona başsağlığı verib. Biden sərhəddən silahların və yaraqlarının keçməsini dayandırmağın vacibliyini də vurğulayıb.
İyunun 25-də Poroshenko-nun bu insidenti rusiyalı həmkarı Vladimir Putinlə telekonfransda müzakirə edəcəyi gözlənir. Telekonfransa Almaniya kansleri Angela Merkel və Fransa prezidenti Francois Hollande da qatılacaq.