Keçid linkləri

2016, 09 Dekabr, Cümə, Bakı vaxtı 06:29
-
“Yeni Müsavat”ın əməkdaşı Fərahim İlqaroğlu ona olunan zorakılıqla bağlı mayın 20-də prezident İlham Əliyevə müraciət edib.

Jurnalist prezidentdən xahiş edir ki, onun döyülməsi barədə sifariş verənlərin cəzalandırılması, istintaqın daha dinamik aparılması üçün müvafiq tapşırıqlar versin. Fərahim İlqaroğlunun AzadlıqRadiosuna dediyinə görə, hələki istintaqın hadisə ilə bağlı hansısa iş gördüyünü hiss etmirlər.

“Biz ümid edirdik ki, məsələ Nizami rayon polis idarəsindən alınıb Daxili İşlər Nazirliyinə veriləndən sonra hansısa addımlar atılacaq. Bizə bir nəfərin saxlandığı barədə məlumat verdilər. Amma əmin deyilik ki, deyilən adam doğurdan da tutulub, ya yox. Məni döyən, əvvəllər heç görmədiyim, tanımadığım Feyruz Termişi adlı idmançı polis idarəsində mənimlə üzləşən zaman etiraf etdi ki, məni döymək sifarişini Kikboksinq Federasiyasının keçmiş idmançısı Tural Bayramovdan alıb”.

“Yeni Müsavat”ın saytında yerləşdirilən müraciətdə həmin şəxsə də sifarişin deputat Elton Məmmədovun oğlu Aynar Məmmədovdan gəldiyini ehtimal edilir.

“Məni döyən Feyruz Termişi saxlanıb. Lakin ona bu əmri verən Tural Bayramov və əsas sifarişçi Aynar Məmmədov hələ də azadlıqdadır. Onların azadlıqda gəzməsi məni və ailəmi ciddi təhlükə altında qoyur”.

Fərahim İlqaroğlu 25 aprel 2014-cü il saat 10 radələrində yaşadığı evin (Bakı şəhəri Nizami rayonu Rüstəm Rüstəmov küç, ev 6) qarşısında döyülüb. Hadisə jurnalistin avtomobilindəki kameraya düşüb.

Hadisə ilə bağlı «xuliqanlıq» maddəsi ilə cinayət işi açılıb. Mayın 7-də AzNews.az-a açıqlamasında deputat Elton Məmmədov oğlu barədə yayılan məlumatlar növbəti iftira adlandırıb:

“Artıq mən bu cür iftiralardan bezmişəm və hesab edirəm ki, belə məlumatlara münasibət bildirməyə dəyməz" deyə o bildirib.

Günün bütün mövzuları

Şərhləri göstər

XS
SM
MD
LG