Ukraynanın şərqində əsirlikdən azad olunmuş yeddi Avropa hərbi müşahidəçisi Berlinə çatıb. ATƏT müşahidəçiləri mayın 3-də axşam artıq Berlində olublar. Almaniyanın müdafiə naziri Ursula von der Leyen deyib ki, onlar “sağ-salamat çatdıqları” üçün “rahat nəfəs alıb”.
Yeddi müşahidəçi və beş ukraynalı zabit aprelin 25-də Slavyanskda saxlanıb. Kremlin təmsilçisi Vladimir Lukin-in müdaxiləsindən sonra, mayın 3-də buraxılıblar.
Ukraynanın prezidenti vəzifəsini icra edən Oleksandr Turchynov mayın 3-də Odessada matəm elan edib. Mayın 2-də 40-dan çox adam həlak olub. Onlardan çoxu rusiyayönlü separatçılar idi. Küçə toqquşmaları həmkarlar ittifaqı binasında yanğınla nəticələnib.
