Qəbri açılmış şairin cəsədinin analizləri açıqlandı
- Pablo Nerudanın cəsədinin analizləri açıqlanıb. Tanımış Çili şairi Pablo Nerudanın qalıqlarının analizi sübut edib ki, o zəhərlənib öldürülməyib.
Reuters-in yaydığı xəbərə görə, noyabrın 8-də 15 nəfərdən ibarət yerli və xarici komissiyanın ekspertləri bu qənaətə gəlib.
Komissiya ünlü şairin qalıqları üzərində 6 ay ərzində araşdırma aparıb.
Pablo Nerudanın tabutu
Çilinin bu işə nəzarət edən Ədliyyə Nazirliyinin yaydığı açıqlamada komissiyanın ekspertlərinin onun qalıqlarında cidd-cəhdlə zəhər izini axtardığı, amma tapmadığı bildirilir.
Xatırladaq ki, bu il aprelin 8-də ölkə rəhbərliyi şairin Augusto Pinochet-in tapşırığı ilə zəhərləndiyi iddialarına aydınlıq gətirmək üçün Pablo Nerudanın cənazəsini Isla Negra-dakı məzarlıqdan çıxarılıb.
Nobel mükafatçısı Pablo Neruda 1973-cü il sentyabrın 23-də – Çilidə silahlı çevrilişdən 12 gün sonra ölüb.
Həmin çevriliş hərbi xuntanın – Augusto Pinochet-in hakimiyyətə gəlməsi ilə nəticələnmişdi.
Rəsmi versiyaya görə, şair prostat vəzinin xərçəngindən ölüb.
Ancaq şairin dostu və şəxsi köməkçisi Manuel Araya məhkəməyə üz tutaraq istintaq təşəbbüsü qaldırıb.
Araya-nın fikrincə, 40 il öncə sentyabrın 22-də Santyaqodakı Müqəddəs Mariya xəstəxanasında Pinochet-in əmri ilə şairə ölümcül iynə vurulub.
Şairin ölüm səbəbini araşdıran hakim Mario Carroza Pablo Neruda-nın xərçəngdən deyil, ürək tutmasından öldüyünü müəyyənləşdirib.
Ondan sonra Çili Kommunist Partiyası 2011-ci ilin dekabrında Pablo Neruda-nın eksqumasiyası ilə bağlı məhkəməyə üz tutub.
Pablo Neruda 1904-cü ildə doğulub.
1971-ci ildə Ədəbiyyat üzrə “Nobel” mükafatına layiq görülüb. 69 yaşında dünyadan köçüb.
AzadlıqRadiosunu Rusiya hökuməti "arzuolunmaz təşkilat" elan edib
Əgər siz Rusiyadasınızsa, bu ölkənin pasportunu daşıyırsınızsa, yaxud orada daimi yaşayan, amma vətəndaşlığı olmayan şəxssinizsə, nəzərə alın- məzmunumuzu paylaşdığınıza, bəyəndiyinizə, şərh yazdığınıza, bizimlə əlaqə saxladığınıza görə cərimə və ya həbslə üzləşə bilərsiniz.
