Keçid linkləri

logo-print
2016, 03 Dekabr, şənbə, Bakı vaxtı 15:47
-

«Azadlıq» qəzetinə qarşı iki iddia irəli sürülüb. İddiaçılardan biri hazırda həbsdə olan Hüseynağa Babayev, digəri isə vaxtilə xalq hərəkatının fəallarından olmuş Təhmasib Novruzovdur.

Hüseynağa Babayev 2011-ci il noyabrında «Azadlıq»da dərc olunmuş «Buzovnada atışmada adam öldürüldü»və «Buzovnadakı atışmanın şok təfərrüatları» başlıqlı yazıda qeyd olunanları özünə qarşı böhtan sayır və qəzetin baş redaktoru Qənimət Zahidin həbs olunmasını istəyir.

Təhmasib Novruzov da hazırda həbsdə olan Bəhlul Muradovun AXCP lideri Əli Kərimliyə sui-qəsd hazırlaması və bu planda onun da əlinin olması haqda 2012-ci ildə qəzetdə dərc edilmiş materiala görə iddia qaldırıb.

«Azadlıq»ın redaktoru Sücəddin Şərifovun sözlərinə görə, qəzet vaxtı ilə hər iki tərəfin mövqeyini dərc edib və üstündən uzun müddət keçəndən sonra onların məhkəməyə müraciət etməsi əsassızdır:

«Buzovna ilə bağlı yazıdan sonra həmin məhbus bizə məktub göndərib və onu olduğu kimi qəzetdə dərc etmişik. Təhmasib Novruzova gəldikdə, onun da mövqeyi bir-iki gün sonra qəzetimizdə geniş dərc olunub».

«MÖVQEYİMİ DƏRC ETMƏSƏLƏR SONA QƏDƏR GEDƏCƏM»

Təhmasib Novruzov isə qəzetdə onun mövqeyinin getdiyini təkzib edir:

«Mən 2012-ci ildə barəmdə çıxan yazı ilə bağlı Yasamal məhkəməsinə müraciət etmişəm, indiyə qədər mənim mövqeyim verilməyib. Bir-iki dəfə proses təyin edilib, amma qarşı tərəf gəlməyib. Mən qəzetdən 50 min manat təzminat istəyirəm. Əgər qəzet mənim mövqeyimi dərc etsə iddiadan imtina edə bilərəm. Etməsələr, sona qədər gedəcəm».

«Azadlıq» qəzetinin redaktoru Sücəddin Şərifov isə deyir ki, onlar Təhmasib Novruzovun məhkəmə iddiası ilə bağlı bildirişi bir-neçə gün əvvəl alıb:

«Biz hər iki tərəfin vaxtı ilə qəzetimizə verdiyi mövqelərini məhkəməyə təqdim edəcəyik. Görünür, məhkəmələrin bu məsələdən xəbəri yoxdur».

Sücəddin Şərifov hər iki iddianı əsasız sayır. O, hesab edir ki, bu, «Azadlıq» qəzetinə və Qənimət Zahidin əsasını qoyduğu «Azərbaycan saatı»na qarşı təzyiqlərin növbəti mərhələsidir.

Günün bütün mövzuları

XS
SM
MD
LG