Keçid linkləri

logo-print
2016, 03 Dekabr, şənbə, Bakı vaxtı 22:06
-
«Elə indicə Binəqədi rayon məhkəmə icraçıları məni zorla şöbəyə aparmaq istəyirdilər... Hadisə ilə əlaqədar 102 xidmətinə zəng etsəm də, heç bir reaksiya yoxdur. Artıq 102 xidməti məni qara siyahıya salıb və hadisə yerinə polis göndərmir» – Bu sözləri iyulun 18-də «Facebook» səhifəsində gənc fəal, Milli Şuranın üzvü Cəmil Hacıyev yazıb. Razılaşdırılmayan aksiyada iştiraka görə cəriməni ödəməkdən imtina edən C.Hacıyevə icbari iş verilib. O, bir neçə gün əvvəl Binəqədi rayon Kommunal Təsərrüfat Birliyində idarə əməkdaşlarının hücumuna məruz qaldığını, 102-yə etdiyi zənglərə isə dərhal reaksiya verilmədiyini bildirir:

«Gördüm vəziyyət çətindir, yumruq-zad vururlar. Dedim, indi zəng edərəm 102 xidmətinə, aydınlaşdırarıq. 5 dəfə zəng etdim, dedilər, «gələcəyik», ancaq gəlmədilər. Binəqədi rayon Polis İdarəsindən oraya haradasa 10 dəqiqəlik yoldur. Yarım saat gözlədim bayırda, gəlib çıxmadı. Çıxıb getdim evimə. Sonra da 4 saylı polis idarəsindən mənə zəng edirlər ki, «ərazini dəqiqləşdiririk, gəlib ərizə yazmalısan». Deyirəm, «qardaş, hadisə yerinə gəlməliydiniz, gəlib çıxmadınız». Əvvəl Binəqədi polisindən dedilər ki, «bir əməliyyat qrupumuz var, siz vətəndaşlar çoxsunuz». Sonra da o bir başqası əlavə etdi ki, «yox, əməliyyat qrupumuz çoxdur»».

Ötən il özünü «Baku Steel Company»nin əməkdaşları kimi tanıdan şəxslər kiçik metaləritmə müəssisələrinə hücum edəndə də həmin şirkətlərin nümayəndələri gileylənirdilər ki, Daxili İşlər Nazirliyinin 102 xidmətinə zəng vurublar, ancaq ya gec reaksiya verilib, ya da heç verilməyib.

ÜNVANIN DƏQİQLƏŞDİRİLMƏSİ VƏ DİGƏR AMİLLƏR

102 xidmətinin işində ləngiməyə səbəbi nədir? Daxili İşlər Nazirliyi mətbuat xidməti rəisinin müavini Ehsan Zahidov AzadlıqRadiosuna müsahibəsində hər hansı yubanmanın olmadığını deyir: Ehsan Zahidov

Ehsan Zahidov


– Vətəndaş rastlaşdığı hər hansı qanun pozuntusu ilə bağlı 102-yə zəng edir. Bu, mərkəzləşmiş qurumdur. 102 dərhal həmin vətəndaşın harada olmasını, ünvanını soruşur. Həmin ünvana yaxın polis bölməsinə məlumat ötürülür. O bölmədən, ya da idarədən əraziyə polis əməkdaşları gəlməlidir. Bəzən vətəndaş polisə öz ünvanını və ya yerləşdiyi ünvanı dəqiq demir. Bu, hadisə yerini axtarıb tapmaqda polisə çətinlik yaradır. Bir səbəb budur. İkincisi, polis əməkdaşlarının olay yerinə çatması bəzən pik saatlara düşür, onlar tıxacla üzləşirlər. Yalnız bu 2 amil üzündən polis hadisə yerinə bir az gecikə bilər. Buna baxmayaraq, polis hadisə yerinə özünü yetirir və vətəndaşın şikayətini araşdırır.

– Ancaq bəzi hallarda 102-nin heç reaksiya vermədiyini deyənlər də var. Ötən il «Baku Steel Company»nin hücumuna məruz qalanlar bildirirdilər ki, bir neçə gün keçib, 102-dən reaksiya yoxdur. Bəzən siyasi amillər də əsas gətirilir.

– Xeyr, elə deyil. 102-yə zəng vurulubsa, narahat olmağa dəyməz. Polisin elə tədbirləri var ki, araşdırma prosesini vətəndaş bilə bilməz. Vətəndaşa elə gəlir ki, polis gəlmədi. Elə deyil. Vətəndaşların 102-yə bütün müraciətləri qeydə alınır, hər bir müraciət barədə də lazımi araşdırmalar aparılır.

– Vətəndaşın müraciətinə dərhal cavab verilmədiyi hallarda da sonradan vətəndaşın polis idarəsinə gəlməyi, ərizə yazmağı tələb olunur. Bu, bəzən vətəndaşı növbəti zəngdən çəkindirir.
Polis

Polis


– Mən 102-yə zəng edirəmsə, 102 məlumatı polis idarəsinə ötürür. Polis idarəsi izahatını almaq üçün vətəndaşı dəvət edir. 102-yə verilmiş məlumat şifahi idi. Vətəndaşın yazılı izahat yazması qanunla tələb olunur. Şifahi zənglə iş bitmir. Vətəndaş həm də bir növ özünün zəng etdiyini təsdiqləyir. Çəkindirmə məsələsi ola bilməz. Bu, vətəndaşın qeyri-səmimiliyindən irəli gələn iddiadır.

AZƏRBAYCAN REALLIĞI?

Keçmiş polis rəisi, polkovnik Mahmud Hacıyev 102 xidmətini polis sahəsində yenilik saysa da, digər ölkələrlə müqayisədə həmin qurumun təkmilləşməsinə xeyli ehtiyac olduğunu vurğulayır. Yubanmanın ünvanın dəqiqləşdirilməsi ilə izahını ekspert məntiqi saymır. Belə ki, polis orqanı üçün ünvan dəqiqləşdirmək çətin olmamalıdır. M.Hacıyev yubanmaların səbəbini digər amillərə bağlayır:

«Zəng edən kimdir, hakimiyyətin, hüquq-mühafizə orqanlarının xoşu gələn, yoxsa antipatiyası olan adamdır? Yaxud hər hansı şirkətə hücum edən dəstənin başında duran kimdir? Dəstə kimə, hansı şirkətə görə hücum edir? Bütün bu amillər Azərbaycan reallığı, Azərbaycan bədbəxtliyidir».

Bu məsələylə bağlı DİN-in Mətbuat Xidmətinin rəis müavini Ehsan Zahidov AzadlıqRadiosu ilə yenidən əlaqə saxlayaraq Mahmud Hacıyevin şərhinə əlavə mövqe bildirib.
E. Zahidov qeyd edir ki, Mahmud Hacıyev şərhində bu xidmətin fəaliyyəti ilə bağlı əsassız olaraq mənfi fikirlər səsləndirib. Onun dediklərinin vətəndaşlar arasında bu xidmətlə əlaqəli xırda da olsa çaşqınlıq yarada biləcəyi ehtimalımdan dolayı oxucuların diqqətinə bəzi məqamları çatdırmaq istəyir:
«Beynəlxalq təcrübəyə uyğun təkmilləşdirilərək 2007-ci ildən çox böyük uğurla ölkəmizin bütün ərazisində tətbiq edilən bu xidmət yarandığı vaxtdan vətəndaşlarımızın etimadını qazanmış, onların güvənc yerinə çevrilib. Bu xidmətin tətbiqi nəticəsində hər il yüzlərlə cinayətin “isti izlər”lə açılması təmin edilir. Keçmiş polis əməkdaşı olan Mahmud Hacıyev də yaxşı bilir ki, 102-yə zəng edən insandan xidmətin əməkdaşı tərəfindən yalnız adı-soyadı və ünvanı soruşulur. Zəng edənin siyasi, dini, milli mənsubiyyəti və hansı peşənin sahibi olması barədə ona sual verilmir. Əksinə, vətəndaş özü, fəaliyyəti barədə ətraflı danışmaq istədikdə xidmət əməkdaşı dərhal onun sözünü kəsərək rastlaşdığı və ya gördüyü hadisə barədə konkret məlumat verməsini xahiş edir. Dediklərimi indiyə kimi 102-yə zəng etmiş minlərlə vətəndaş da təsdiqləyir. Yeri gəlmişkən onu da bildirim ki, DİN hər hansı cinayət faktı barədə vətəndaşların ilk növbədə 102 Xidmətinə müraciət etməsində həmişə maraqlıdır. Əminəm ki, Mahmud müəllim 102 ilə bağlı dediyim bu xırda qeydlərimin həqiqət olduğunu yaxşı bilir. Sadəcə, «ağa » «qara » demək onun çoxdankı hobbisidi».

Şərhləri göstər

XS
SM
MD
LG