Keçid linkləri

2016, 10 Dekabr, şənbə, Bakı vaxtı 20:35
-
«Ya ətdən zəhərləniblər, ya da şorba köhnə olub. Alüminium qazanda saxlayıblar».

Bağçada qidadan zəhərlənən uşaqlardan birinin valideyni İradə Həsənova AzadlıqRadiosuna belə deyir. Dekabrın 13-də Binəqədi rayonundakı 138 saylı bağçada kütləvi zəhərlənmə olub. 15 uşaq xəstəxanaya aparılıb. Ev şəraitində müalicə olunanlar da olub.

İradə Həsənova deyir ki, səhər oğlunu bağçaya yola salanda uşaq tam sağlam olub:

«Uşaq bağçadan qayıdandan sonra qusmağa başladı. Əvvəl şübhələnmədik. Sonradan başqa valideynlər də zəng elədilər ki, uşaqları qusur. Müəlliməsi də zəng edib uşağın halını soruşdu. Başa düşdük ki, bağçadakı uşaqlar nədənsə zəhərləniblər. Uşaq səhər yaxşı idi. Bağçada da ətli makaron şorbası yeyib».

«DƏQİQ SƏBƏBİ ANALİZ NƏTİCƏLƏRİ GÖSTƏRƏCƏK»

İradə Həsənova oğlunu evdə bildiyi üsulla müalicə edib. Amma zəhərlənən uşaqlardan 13-ü - 2 saylı Uşaq və 7 saylı Şəhər Xəstəxanalarına yerləşdirilib. Dekabrın 14-də uşaqların hamısı buraxılıb. Zəhərlənən uşaqların hamısının vəziyyəti yaxşılaşıb.

Zəhərlənmə halı Binəqədi Polisində araşdırılır. «İstehlakçıları aldatma, pis keyfiyyətli məhsul istehsal etmə və satma» maddəsi ilə cinayət işi də açılıb.

Zəhərlənmənin dəqiq səbəbi analiz nəticələrindən sonra bilinəcək. Bunu AzadlıqRadiosuna 2 saylı Uşaq Xəstəxanasında baş həkimin müavini Eldar Rəhimov deyib:

«Dekabrın 13-ü saat 19:30 radələrində xəstəxanaya 13 uşaq gətirilib. Onlardan 11-nin vəziyyəti kafi olduğu üçün xəstəxanaya qəbul olunub. Uşaqların hamısı bu gün artıq evə buraxılıb. Uşaqlar bildiriblər ki, onlar günorta bağçada şorbadan başqa heç nə qəbul etməyiblər. Ona görə də, ehtimal olunur ki, uşaqlar elə supdan Bakıda uşaq bağçası

Bakıda uşaq bağçası

zəhərləniblər».

ZƏHƏRLƏNMƏ, YOXSA SOYUQDƏYMƏ?

138 saylı bağçanın müdirəsi Seyranə Qasımova uşaqların qidadan zəhərlənməsi fikri ilə razılaşmır, bildirir ki, uşaqlara soyuq dəyib:

«Bu, zəhərlənmə deyil, soyuqdəymə ilə bağlı olub. Uşaqlarda mədə-bağırsaq pozuntusu yaranıb. Ərzağı «Zirvə» MMC-dən alırıq, keyfiyyətində də hər hansı problem yoxdur. Yeməyi isə özümüz hazırlayırıq».

Bu ilin avqustunda Bakıdakı uşaq bağçaları Təhsil Nazirliyindən alınaraq Bakı şəhər İcra Hakimiyyətinin tabeliyinə verilib. Bağçaların qida təminatı ilə bağlı tenderi icra hakimiyyəti elan edir. İcra hakimiyyətindən müsahibə üçün ilk cəhdlərimiz nəticə vermədi. Lakin ötən il AzadlıqRadiosunun araşdırmışdı ki, cəmi bir nəfər işçisi olan «Boyat» şirkəti müxtəlif qurumları qida ilə təmin etmək üçün ümumilikdə 1 milyon manatlıq tenderlərin qalibi olub.

AzadlıqRadiosu uşaq bağçalarına ərzağın verilməsi üçün tenderin necə keçirilməsi, kimlərin qalib gəlməsi ilə bağlı mövzunu davam etdirəcək.

«PERAŞKİ»Nİ NƏDƏ BİŞİRİRLƏR?

Foto: Arxiv

Foto: Arxiv

Başqa bir valideyn Xalidə Əhmədovanın fikrincə, təhsil müəssisələrindəki yeməklərin keyfiyyətini bilmək üçün iki göz yetər:

«Uşaqlarımın oxuduğu məktəbdə «peraşki»ni sovetlər vaxtı istifadə olunan, köhnə sterilizə qablarında bişirirlər. Təsəvvür edin, yağ orda günlərlə qalır, ertəsi gün üzərinə əlavə yağ töküb bişirirlər. Əllərini yumağa belə yerləri yoxdur. Hələ bişirənlər... Onların sağlamlıq durumu ilə, təhsil müəssisələrindəki vəziyyətlə heç maraqlanan yoxdur».

Standartlaşdırma və Patent üzrə Dövlət Agentliyinin mətbuat xidmətinin rəhbəri Fazil Talıbov təhsil müəssisələrində qida təminatı ilə bağlı ciddi problemlər olduğunu danmır:

«Komitənin 963 saylı Qaynar Xəttinə də bu barədə şikayətlər gəlir. 138 saylı bağçadakı kütləvi zəhərlənmə bu problemlərin tezliklə həll olunması məsələsini gündəmə gətirdi. Uşaq bağçalarında azyaşlılara verilən yeməklər, eləcə də bütün təhsil müəssisələrində satılan qida məhsulları, qida rasionu, qidaların keyfiyyəti və təhlükəsizliyi ilə bağlı işçi qrupu bir ay müddətində milli standart layihəsi hazırlamalıdır».

Milli standart layihəsini dekabrın 4-də yaradılan işçi qrupu hazırlayır. 2013-cü ilin əvvəlində layihənin hazır olacağı nəzərdə tutulur. Qrupa səhiyyə, təhsil nazirlikləri, Ailə, Qadın və Uşaq Problemləri üzrə Dövlət Komitəsinin nümayəndələri daxildir.

Şərhləri göstər

XS
SM
MD
LG