Keçid linkləri

2024, 29 Mart, Cümə, Bakı vaxtı 13:54

Sən məndə üzməyi öyrənəndə artıq mən səndə çoxdan boğulmuşdum...


-

Şəhriyar del Gerani


"Facebook janrı"


1 – hər gün qapınızdan bir uşaq boylanır,
hər gün də
elə bilirəm
uşaqlığındı...

2 – gedəndə də qatar kimi gedəsən, hamı sənə gecikə...

3 – Qəbul otağında:

sizinləyəm, xadimə xanım, bu qapının ağzında çiliklənmiş adamları niyə süpürmürsüz...?

4 – Sənin kölgən quş kölgəsi kimidi, sığınmaqçün gərək əvvəlcə qaçasan...

5 – bu gündən səninçün üzü qibləyə darıxacam,
heç olmasa allah qəbul eləsin...

6 – bu yalnızlığın tam o üzündə,
o yorğun kərpic evin çartlaq
və mürgülü pəncərəsində
gülümsəyən uşaq,
anamın yeganə oğludu. . .

7 – səni elə unudaram, hamının yadından çıxarsan...!

8 – o yol səni aparıb düüü.....z mənə çıxardacaq,
çatmamış sola dönərsən

9 – bir küçəlik deyil ki yolumuz
gedib axırına çıxasan...
bir də aramızda anlaşılmaz uçurumlar var,
qorx ki sağ qalarsan...

10 – bir sevimli ayrılığın vardı, onu da qayıdıb öldürdün...

11 – sevgiyə payız gələndə əvvəlcə barmaqlar tökülər saçlarından. Sonraysa öpüşlər qəribsəyər nigaran dodaqlarında...

12 – qəfildən qapı döyülə,
açıb görəsən özünsən...

13 – ömründə bircə dəfə də olsun kişi olmayan adamdan qadını başa düşməsini tələb eləmək heç kişilikdən deyil.

14 – Kor qadına:

sən heç vaxt necə qocaldığını görməyəcəksən, buyur, bu da səadət...

15 – sən məndə üzməyi öyrənəndə artıq mən səndə çoxdan boğulmuşdum...

16 – sonunda bütün kədərlər qatar yoluna düzülən sərçələr sayaq pırıltıyla uçuşurlar dostum...

17 – cavabı susmaq olan bütün suallar gözəldi...

18 – yumurta puluyla böyüyən uşaqlar heç vaxt Vətən sevgisiylə Toyuq sevgisini ayırmazlar...

19 – bir gün unutduğun dostun gəlib deyə: "bağışlayın, siz məni itrməmisiz"?...

20 – Adəm cənnətdən qovulmağa bəhanə axtarırdı. Çünki darıxırdı...

21 – güzgü sındı...
bəzədiyi üzü
ayaqlarının altına töküldü
qadının...

22 – sən kərpic ev kimi uçdun,
mən kəpənək kimi gözləyirdim...

23 – əgər yeriyə bilirsənsə, o demək deyil ki, mütləq kimdənsə getməlisən...

24 – yardım edən əllər dua oxuyan ağızlardan daha müqəddəsdi...

25 – sən hardan biləsən küçük həsrətim
hər gün qapınıza baxıb ulayır...

27 – görüm səni kəndinizin itləri də unutsun...

28 – biz oyuncaqlarımızı bir dilim çörəyə dəyişmiş uşaqlarıq, dostum...

29 – gedəndə elə gedəsən qayıdacağına anandan savayı kimsənin ümidi olmaya...

30 – al bu baltanı, haramda unudulmusansa elə ordan vur getsin...

31 – bir divara söykənib də xoşbəxt ola bilərsən,
inan... guya bu doğurdan da belədi...

32 – itin olsaydım, ancaq özümə hürərdim. Sənin bütün yadların mənəm deyəsən...

35 – Qadınlar səssiz ağlayarlar, eynən balıqlar kimi...

36 – səni bu gün o qədər düşünmüşəm...yorğunsansa, bil ki, bu, sənin günahın deyil əslində...

37 – sən məndə yoxa çıxırsan,
gəl özünə yiyə çıx...

38 – müsəlman qadına sevdiyini sübut eləmək - şahmatı zərlə oynamaq kimi bir şeydi...

39 – adamların heç vaxt özlərinə qarşı etdiyi haqsızlıqlara görə özlərindən üzr istəməyə vaxtları olmur...

AzadlıqRadiosunu Rusiya hökuməti "arzuolunmaz təşkilat" elan edib.

Əgər siz Rusiyadasınızsa, bu ölkənin pasportunu daşıyırsınızsa, yaxud orada daimi yaşayan, amma vətəndaşlığı olmayan şəxssinizsə, nəzərə alın- məzmunumuzu paylaşdığınıza, bəyəndiyinizə, şərh yazdığınıza, bizimlə əlaqə saxladığınıza görə cərimə və ya həbslə üzləşə bilərsiniz.

Ətraflı məlumat üçün bura klikləyin.

XS
SM
MD
LG