Keçid linkləri

logo-print
2016, 05 Dekabr, Bazar ertəsi, Bakı vaxtı 15:01

Necə rəhmlidir, necə amansız... qadın ürəyi...


-

"Qanun" nəşriyyatı ötən əsrin ünlü şairi Tofiq Bayramın əsərlərini latın qrafikasında çap edib.

"Ay anam Bakı" adlanan kitabda şairin müxtəlif illərdə yazdığı şeirlər: Əmircan löv­hələri, uşaq şeirləri, poemalar, sa­tirik şeirlər, pyes­lər, on­luqlar toplanıb.

Tofiq Bayram şeirlə­rinin əsas qa­yəsini vətənə, yurda, in­sa­na ülvi məhəbbət hissləri təşkil edir...

Ümid­varıq ki, bu kitab 60-70-ci illərdə ol­du­ğu kimi oxu­cuların dərin rəğbətini qazana­caqdır" - deyə nəşriyyatın təqdimatında deyilir.


Tofiq Bayram


QADIN ÜRƏYİ

Necə rəhmlidir, necə amansız,
Necə mehribandır qadın ürəyi!
Sən onu sındırsan, bil ki, a qansız,
Ağlayan kamandır qadın ürəyi.

...Güldürsən, ömürlük səadətindir,
Söndürsən, yanmağı bir də çətindir.
O, əsl qayğının, məhəbbətindir,
Sevgisiz zindandır qadın ürəyi.

Daşı da əridər, daş da olar o,
Əriyib gözlərdə yaş da olar o.
Bahar da olar o, qış da olar o,
Damladır, ümmandır qadın ürəyi.

Onunla dünyadır sənə qəfəs də,
Onsuz heç yaşama bu torpaq üstə.
Sevən bir ürəyə axır nəfəsdə
Ən gözəl dərmandır qadın ürəyi.

Onu alçaldan da, ucaldan da biz,
Dərd verib, vədəsiz qocaldan da biz.
Qədrini biləndə bu cahanda biz,
Həmişə cavandır qadın ürəyi.

Bəzən gül tək solar acı bir sözdən,
Ağlayar xəlvəti, gülsə də üzdən.
Bəzən uşaq kimi bir ürəksizdən
Məhəbbət umandır qadın ürəyi.

Bir namərd əlindən zəhər içəndə,
Keçirər ömrünü o, yas içində.
Bəzən ən qiymətli libas içində,
Nalədir, fəğandır qadın ürəyi.

Sənsiz əl çəkərəm arzudan, kamdan,
Nə çıxar sevgisiz-sənsiz ilhamdan?
İncitsən, dözərəm, Tofiq Bayramdan
İncimə, amandır, qadın ürəyi!

Şərhləri göstər

XS
SM
MD
LG