Keçid linkləri

2016, 09 Dekabr, Cümə, Bakı vaxtı 00:32
-

Populyar Braziliya yazıçısı, əsərləri dünyada 140 milyon tirajla satılmış Paulo Coelho bu həftə Azərbaycana gələcək.

65 yaşlı yazıçı Braziliyanın aparıcı qəzetlərindən olan "Folha de S.Paulo"ya (tiraj 300 min) telefonla verdiyi müsahibədə deyib ki, daha dünya ölkələrini gəzib kitablarını reklam etməyə, imza günləri keçirməyə ehtiyacı yoxdur, çünki bu işi sosial şəbəkələr vasitəsilə də görmək olar.

(Coelho-nun Twitter-də 15 milyon, Facebook-da isə 9 milyon fanı var).

"Mən indi yalnız maraqlı yerlərə getməyi qəbul edə bilərəm. Gələn həftə Azərbaycana gedirəm" - deyə Coelho bildirib.

(Müsahibə avqustun 4-də çap edilib).

Coelho hazırda "Manuscrito Encontrado em Accra" adlanan 22-ci romanını buraxır ("Sextante" nəşriyyatı).

Yazıçı, demək olar ki, 24 saat on-line-dır.

O öz oxucuları ilə birbaşa ünsiyyət qurur. Hətta bəzi kitablarını qazanc güdmədən internetdə özü yayır.

"Twitter mənim üçün bir bardır. Mən orda əyləşib başqalarının danışdıqlarına qulaq asıram, özüm də nədənsə söhbət açıram, atmosferi hiss edirəm" - deyə yazıçı müsahibəsində bildirir.

Coelho 20-ci əsrin ən böyük yazıçılarından sayılan, modernist James Joyce-un bostanına da daş atıb.

O deyib ki, tənqidçilərin nə deməsindən asılı olmayaraq özünü müasir yazıçı sayır və eksperimental üslubları qəbul etmir:

"Mən ona görə müasir yazıçıyam ki, mürəkkəb olanı asanlaşdırıram. Buna görə də bütün dünya ilə rahat ünsiyyət qururam".

Coelho deyir ki, yazıçılar tanınmaq üçün əsərlərinin məzmununda yox, formasında yeniliklər edəndə rüsvay olurlar.

"Bu gün yazıçılar bir-birinə öz üstünlüyünü sübut etməyə istəyir" - deyən Coelho vəziyyətin bu həddə çatmasında məşhur James Joyce-u günahkar sayır:

"Ədəbiyyata böyük ziyan vurmuş kitablardan biri də James Joyce-un "Uliss" romanıdır.

Bu əsər başdan-ayağa üslub eksperimentidir. İçində heç nə yoxdur.

Bu üslub libasını çıxarın və "Uliss"in bir twit-dən başqa heç nə olmadığını görəcəksiz".

Coelho Azərbaycana hansı məqsədlə gəldiyini deməyib.

Onun Azərbaycanda indiyəcən bir neçə romanı çap edilib.

Bu səfərlə bağlı xəbəri dəqiqləşdirməyə və əlavə məlumat öyrənməyə çalışacağıq.

Günün bütün mövzuları

Şərhləri göstər

XS
SM
MD
LG