Keçid linkləri

2024, 29 Mart, Cümə, Bakı vaxtı 15:39

Xuraman Hüseynzadə. Yeni şeirlər



Bu elə bir günah ki...


Bir kişi qocalacaq mənimlə
bir ömür boyu
bir damın altında.
Həyatımı daim
bir hüzn bürüyəcək,
bir kişi qollarım arasında
ürəyimin hərarətindən əriyəcək.
O, sən olmayacaqsan dostum,
sən olmayacaqsan...

Onun gözlərində
sənin baxışlarını axtaracam,
dodağında
öpüşlərini.
İkinci dəfə doğulacam
başqa birinin olmaq üçün
sənin sevgində boğulacam
başqa birindən
qisas almaq üçün.

Yaşlı qadınların
“Qoşa qarıyın”,
“Bir yastıqda qocalın” kimi
qarğışlarından sonra
xoşbəxt olmağım mümkünsüz...
Qovuşacam sənə
özümü
ürəyimin şah damarından asdıqda,
qocalacam
bir kişi ilə bir yastıqda.
O, sən olmayacaqsan, dostum,
sən olmayacaqasan.

Mən səni sevdim, dostum,
tək səni sevdim...
Səninlə qocalmaq
mümkünmü heç?
Bu, elə bir günah ki,
Sənə demərəm:
günahımdan keç!..


Sənin cənnətin

Xeyirxah ol,
spirtli içki içmə,
xəyanət etmə,
oruc tut, namaz qıl, ibadət et...
Yerin cənnət olacaq.
Yenə də
səni ayaqlayıb keçməyəcəm
ayaqlarımın altındakı
cənnətdə...

AzadlıqRadiosunu Rusiya hökuməti "arzuolunmaz təşkilat" elan edib.

Əgər siz Rusiyadasınızsa, bu ölkənin pasportunu daşıyırsınızsa, yaxud orada daimi yaşayan, amma vətəndaşlığı olmayan şəxssinizsə, nəzərə alın- məzmunumuzu paylaşdığınıza, bəyəndiyinizə, şərh yazdığınıza, bizimlə əlaqə saxladığınıza görə cərimə və ya həbslə üzləşə bilərsiniz.

Ətraflı məlumat üçün bura klikləyin.

XS
SM
MD
LG