Keçid linkləri

2024, 28 Mart, Cümə axşamı, Bakı vaxtı 23:10

Rasim Qaraca "Sadəcə maraq xatirinə" (Şeirlər)



Çox gec


Çox gec oldu səninlə tanışalı
Günəş batmış qar ərimiş
Quzular örüşdən qayıtmışdı

Nargilələr budağında qurumuş
Sırsıralar torpağa düşmüş
Fələk ruzigarını əsdirmişdi

Çox gec oldu...
Kitablar saralmış
Dəftərlərin vərəqi qopmuş
Xəzəllər yerlə bir olmuşdu...

Axşam yeməyinə getdiyimiz lokanta qapanmış
Səyyar satıcılar çəkilib getmiş
Arabaların motoru susmuşdu

Əlində dəryaz qara niqablı adam
Arxamızca daban-dabana
Bizə çay gətirən qarsonun
Əlindən təpsisi düşmüşdü

Məktəb qapısında
Sarı çantalı uşaqlar...
Zəng çalınmışdı
Bahar budağından qopmuşdu

Polislərin qan sızmış gözlərində
Batan günəş əks olunmuşdu
Əyilib yerdən oyuncağını götürən bəbə
Bizə baxıb gülümsəmişdi

Çox gec oldu səninlə tanışalı...
Çox gec!


Sadəcə maraq xatirinə

maraqlıdır həyatda yaşamaq
yol getmək, mahnı oxumaq
lap elə daş daşımaq

sərgi düzəldib sevgilərdən
toplamaq siqaret kötüklərini
divarlardan asmaq
kürəyinə saplanmış bıçaqları

sadəcə maraq xatırına
bağlanmaq bir qadına
puç etmək həyatını

maraqlıdır həyatda yaşamaq
qəşəng ayaqların arxasınca düşüb
yol azmaq
sonra heç tapılmamaq

tütün çəkib
tüstüsünü püfləmək göyə
öskürüb
keçdiyin yola tüpürmək

maraqlıdır yaşamaq
qan içmək
bəzən nar yerinə
kəsib əlini

salam almaq
salam vermək
səhərlər üz verdiyinə
axşamlar üz çevirmək

yaşamaq boş-boşuna
dilənmək
allaha əl açmaq

maraqlıdır həyatda yaşamaq
dostluq etmək və hərdən
“heç kimsəm yoxdur” demək

bir az araq içib
yumruğunu çırpmaq yer kürəsinə
“mənəm aç” demək...

adyazar.az

AzadlıqRadiosunu Rusiya hökuməti "arzuolunmaz təşkilat" elan edib.

Əgər siz Rusiyadasınızsa, bu ölkənin pasportunu daşıyırsınızsa, yaxud orada daimi yaşayan, amma vətəndaşlığı olmayan şəxssinizsə, nəzərə alın- məzmunumuzu paylaşdığınıza, bəyəndiyinizə, şərh yazdığınıza, bizimlə əlaqə saxladığınıza görə cərimə və ya həbslə üzləşə bilərsiniz.

Ətraflı məlumat üçün bura klikləyin.

XS
SM
MD
LG