«BİZ QƏTİ SÖZÜMÜZÜ DEYƏCƏYİK»
Kənd Ağsaqqallar Şurasının sədri məşədi Natiq Kərimov bildirdi ki, Nardaranda iqtisadi durum dözülməzdir və bunun həm obyektiv, həm də subyektiv səbəbləri var:
«Təzə transformatorlar, sayğaclar qoydular – bunların hamısını biz görürük, burda müəyyən işlər gedir, bunun böyük söhbəti var. Allah deyən olsun, hesab-kitab ortalığa gələndə dəqiqliyi ilə söhbət edəcəyik. Hökumət korrupsiya ilə nə dərəcə mübarizə aparacaq biz onu da görəcəyik və böyük mitinqə hazırlaşmaq məsələsi olacaq burada və biz qəti sözümüzü deyəcəyik».
Aksiyada deyildi ki, nardaranlı olduqlarına görə uşaqları işdən çıxarırlar, korrupsiya ilə mübarizədən danışırlar, ancaq korrupsiya kənddə baş alıb-gedir:
«DEPUTAT SUSURSA, VƏTƏNDAŞ DANIŞMAĞA MƏCBURDUR»
- «İş yeri yoxdur. Rüşvət, korrupsiya, özbaşınalıq baş alıb gedir. Söz azadlığına görə, fikrini ifadə edən hər bir şəxs üçün Azərbaycanda həbs olunmaq təhlükəsi daha realdır. Bu yaşanan problemlər saxta seçkilərin təzahürüdür. Bu il seçilən deputat parlamentdə hələ də susur, danışmır. Deputat danışmadığı müddətdə sözsüz ki, vətəndaş danışmaq məcburdur».
- «Biz görmüşük ki, qiymət artanda, insanlar varlanır. Varlanırsınızsa bu insanlara imkan yaradın ki, heç olmasa normal yaşasın. Sabah sizin üstünüzə qalxmasınlar. Mən belə hesab edirəm ki, bütün məmurlar prezidenti aldadır».
Aksiya iştirakçıları bildirdilər ki, tələbləri nəzərə alınmasa, hər cümə aksiya keçirməyə qərarlıdırlar. Üstəlik, bu aksiyaya Azərbaycan rayonlarından da adamlar dəvət edəcəklər.
