Keçid linkləri

2016, 08 Dekabr, Cümə axşamı, Bakı vaxtı 02:14

Bakıda söz və fikir azadlığına dəstək forumu keçiriləcək


Sentyabrın 7-9-da Bakıda «Azərbaycanda söz və ifadə azadlığına ictimai dəstək» Forumu keçiriləcək. Forumda məqsəd ölkədə söz və ifadə azadlığı ilə əlaqədar problemlərin müzakirəsidir.

Forum vətəndaş cəmiyyətinin bu istiqamətdə səylərinin konsolidasiyasına, hökumət və digər sektorlarla dialoq və əməkdaşlıq üçün platformanın yaradılmasına çalışır.

Tədbir Avrointeqrasiya Milli Komitəsi, «Yeni Nəsil» Jurnalistlər Birliyi, İfadə Azadlığı Komitəsi, «Azərbaycan Naminə» İctimai Forumu, Azərbaycan Jurnalistlər İttifaqı, Açıq Cəmiyyət İnstitutu -Yardım Fondu və «Turan» İnformasiya Agentliyinin təşəbbüsü ilə keçiriləcək.

Forumun ilk iki günündə söz və fikir azadlığına həsr olunmuş kitab, foto və karikatura sərgisi keçiriləcək. Digər tədbirlər, o cümlədən Frontlayn (ön xətt) jurnalist diskussiya klubunun açılışı olacaq.

Tədbirin sonuncu günündə beynəlxalq konfrans keçiriləcək. Konfransda tanınmış xarici və yerli ekspertlər, jurnalistlər, ictimai xadimlər, dövlət qurumlarının nümayəndələri və bir sıra iri beynəlxalq təşkilatların rəhbərləri iştirak edəcəklər.

Forum Azərbaycanda söz və ifadə azadlığının inkişafındakı xidmətlərə görə xüsusi mükafatın təqdim olunması ilə başa çatacaq. Laureatı əvvəllər məhkəmə çəkişmələrinə məruz qalmış və peşə fəaliyyəti ilə əlaqədar cinayət məsuliyyətinə cəlb olunmuş jurnalistlər seçəcəklər.

Konfransda Forumun qətnaməsinin, ictimaiyyət və dövlət qurumları üçün fikir azadlığının inkişafına dair təkliflər və tövsiyələr paketinin qəbulu gözlənilir.

Günün bütün mövzuları

XS
SM
MD
LG