Keçid linkləri

2024, 29 Mart, Cümə, Bakı vaxtı 18:44

Müxalifətin növbəti aksiyası da dağıdıldı...


«Azadlıq» blokunun aksiyası
«Azadlıq» blokunun aksiyası
Daxili İşlər Nazirliyinin sözçüsü Ehsan Zahidov AzadlıqRadiosuna bildirib ki, saxlanılanlardan 10 nəfəri cəzalandırılacaq:

«Məndə olan məlumata görə, polis bölməsində aksiya iştirakçılarının bəziləri ilə izahedici söhbət edib buraxırlar. Amma 10 nəfər barəsində İnzibati Xətalar Məcəlləsinə uyğun protokol tərtib olunub, məhkəməyə göndərilib».

***

Aksiya ilə bağlı son məlumatlara görə, ümumilikdə 80 nəfər aksiya iştirakçısı polis tərəfindən saxlanılıb. Onlardan bəziləri şəhərin müxtəlif yerlərdə buraxılsalar da, 52 nəfər Səbayel rayon Polis şöbəsinin müxtəlif bölmələrinə aparılıblar. Onlardan 33 nəfəri Səbayel rayon 8-ci Polis Bölməsində, 12 nəfər 9-cu Polis Bölməsində, 7 nəfər isə 39-cu Polis Bölməsində saxlanılırlar.

FOTO:


AKSİYADAN BÜTÜN FOTOLARA BURADA BAX


Xalq Cəbhəsi Partiyasının sədri Əli Kərimlinin sürücüsü Kərim Mehdiyev Bakının Binəqədi rayonu ərazisində saxlanaraq polis idarəsində dindirilib. AXCP sədrinin köməkçisi Faiq Əmirov «Media forum» saytına bildirib ki, sürücünü aprelin 26-da Bakı Şəhər İcra Hakimiyyətinin qarşısına təyin olunmuş piketdən əvvəl saxlayıblar:

«Sürücü sərbəst buraxılsa da, maşını cərimə meydançasına salıblar».

***

AXCP-dən verilən məlumata görə, 80-dək fəal saxlanılıb, sərnişin avtobuslarına mindirilib şəhərin müxtəlif yerlərində buraxılıb. 8-ci polis bölməsində saxlanılanlardan başqa, 15 nəfər başqa polis bölmələrinə aparılıb. Yerləri dəqiqləşdirilir.

***

Saxlanılanlardan «Azadlıq» qəzetinin yazarı Natiq Ədilovun verdiyi məlumata görə, Səbayel rayon 8-ci bölməsində hazırda 50-dək aksiya fəalı var.

Bölmənin növbətçisi isə AzadlıqRadiosuna deyib ki, ora cəmi 30 nəfər gətirilib.

***

Aksiyanın dağıdılmasında iştirak edən mülki geyimli şəxslər jurnalistləri ərazidən uzaqlaşdırırlar. Onlar AzadlıqRadiosunun müxbirinə özlərini sıravi vətəndaş kimi təqdim ediblər.

***

Bakı Şəhər İcra Hakimiyyəti qarşısında təxminən 20-dən artıq aksiya iştirakçısı polis maşınları və sərnişin avtobusları ilə ərazidən uzaqlaşdırılıb.

Aksiyanın dağıdılmasında iştirak edən polis nümayəndəsi bildirib ki, onlar Səbayel rayon 8-ci polis bölməsinə aparılıblar.

Səbayel rayon Polis İdarəsinin rəis müavini Kamal Vəlişov AzadlıqRadiosuna bildirib ki, aksiyada iştirak edənlər saxlanılmır, onlar sadəcə olaraq ərazidən kənarlaşdırılır. Kamal Vəlişov aksiyanın dağılmasında polislərlə birgə iştirak edən mülki geyimli şəxslərin kim olması barədə suala cavab olaraq bildirib ki, o belə bir adamları görməyib.

ATƏT-in Bakı ofisinin əməkdaşları da aksiyanın gedişini izləyirlər.

***

AXCP sədrinin müavini Nurəddin Məmmədli və daha 5 nəfər saxlanılıb. Aksiya nəzərdə tutulan yerə toplaşanlar şüarlar səsləndirməyə başlayıblar.

***

Aprelin 26-da «Azadlıq» blokunun Bakı Şəhər İcra Hakimiyyətinin binası qarşısında razılaşdırılmamış aksiya keçirəcəyi gözlənilir. Bloka daxil olan Azərbaycan Xalq Cəbhəsi Partiyası Ali Məclisinin sədri Həsən Kərimovun verdiyi məlumata görə, aksiya ilə bağlı Bakı şəhər İcra Hakimiyyətinə müraciət edilməsinə baxmayaraq, bloka cavab verilməyib.

Azadlıq blokuna AXCP, Liberal, Vətəndaş və İnkişaf partiyaları daxildir. Blok şəhər rəhbərliyinə «Azneft» meydanı, «Teleteatr»ın qarşısı, Parlament prospekti, Cavid bağı,
«Nərimanov» kinoteatrının qarşısı, Cəfər Cabbarlı heykəlinin qarşısı və ya Sahil bağının ərazisində mitinq keçirilməsinə icazə verilməsi ilə bağlı müraciət etmişdi.

Onlar əsasən sərbəst toplaşma azadlığının pozulmasına etiraz edir.

AzadlıqRadiosunun müxbiri xəbər verir ki, Bakı Şəhər İcra Hakimiyyəti qarşısında polis və mülki geyimlilər gözə dəyir. Ərazidə 8 polis polis maşını var.
Təxminən 30 xidməti geyimli, 50 mülki geyimli şəxs aksiya keçiriləcək yerə nəzarət edir.

Hazırda İcra Hakimiyyəti istiqamətində gediş-gəliş məhdudlaşdırılıb.

İçərişəhər metrosundan və İqtisad Universiteti tərəfdən piyadaların hərəkəti dayandırılıb. Metrodan çıxanları keçidə yönəldirlər.


AzadlıqRadiosunu Rusiya hökuməti "arzuolunmaz təşkilat" elan edib.

Əgər siz Rusiyadasınızsa, bu ölkənin pasportunu daşıyırsınızsa, yaxud orada daimi yaşayan, amma vətəndaşlığı olmayan şəxssinizsə, nəzərə alın- məzmunumuzu paylaşdığınıza, bəyəndiyinizə, şərh yazdığınıza, bizimlə əlaqə saxladığınıza görə cərimə və ya həbslə üzləşə bilərsiniz.

Ətraflı məlumat üçün bura klikləyin.

XS
SM
MD
LG