Dövlət Film Fondunun rəhbəri Cəmil Quliyevin rəhbərlik etdiyi nümayəndə heyəti Gürcüstanın milli arxivində ezamiyyətdə olub.
C. Quliyevin APA-ya verdiyi məlumata görə, səfər zamanı Gürcüstan Milli Film Fondundan nadir və qiymətli arxiv sənədlərinin surətləri Azərbaycana gətirilib.
Fond rəhbəri bu sənədlər arasında rus fotoqrafı Dmitri Yermakovun 1854-1880-ci illərdə Bakı, Şamaxı, Gəncə, Şəki, Lənkəran və Naxçıvanda çəkdiyi fotoların surətlərinin, XX əsrin əvvəllərində gürcü kinooperatorları tərəfindən lentə alınmış Bakı komissarlarının dəfni ilə bağlı kinokadrlar və 1928-ci ildə Azərbaycan Mərkəzi İcraiyyə Komitəsinin iclasların kinoxronikasının olduğunu deyib:
“Bu xronikalar arasında Azərbaycan Milli Dram Teatrının 1960-cı ildə Tiflis şəhərində qastrol səfərindən çəkilmiş kinolent də var. Azərbaycanın ilk professional kinorejissoru Səməd Mərdanovun, eləcə də xalq artisti, teatr və kino aktyoru Mustafa Mərdanovun Tiflis şəhərində vaxtilə yaşadıqları evin təsviri və fotoları da çəkilərək fondun arxivinə daxil edilib”.
C. Quliyev əlavə edib ki, bu yaxınlarda Gürcüstan Milli Film Arxivindən akademik Mustafa Topçubaşovla bağlı unikal kino kadrları da fonda daxil olacaq.
