Səfa Mirzəyev
Azərbaycanın «Alternativ xidmət haqqında» qanun layihəsi rəy alınması üçün yenidən Avropa Şurasının (AŞ) Venesiya Komissiyasına təqdim olunub. Bu barədə «APA»ya açıqlamasında Milli Məclis Aparatının rəhbəri Səfa Mirzəyev məlumat verib.
S.Mirzəyev deyir ki, AŞ ekspertlərinin birinci dəfə layihəyə verdikləri rəydə qeyd olunan tövsiyələrə baxılıb, sənəd üzərində yenidən işlənərək təkrar rəy alınmaq üçün Venesiya Komissiyasına təqdim edilib:
«Onlar layihəni bizə göndərdikdən sonra sənədi Milli Məclisin müzakirəsinə təqdim edə bilərik. Bu davam edən bir prosesdir. Sənəd üzərində iş gedir».
«Alternativ xidmət haqqında» qanun dini və ya digər əqidəsinə görə hərbi xidmət keçə bilməyən vətəndaşların alternativ xidmət etmə qaydalarını müəyyən edir.