Keçid linkləri

2016, 11 Dekabr, bazar, Bakı vaxtı 14:20

«Seçki pozuntuları sifarişlə həyata keçirilir»


Bəşir Süleymanlı və Məhərrəm Zülfüqarlı

Bəşir Süleymanlı və Məhərrəm Zülfüqarlı

Noyabrın 13-də bələdiyyə seçkilərində imzatoplama kampaniyası başa çatdı.

Mərkəzi Seçki Komissiyasının (MSK) məlumatına əsasən, 1718 bələdiyyə üzrə 35 mindən çox şəxs namizədliyini irəli sürüb. Onlardan hələ ki, 28 mini qeydə alınıb. Qeydə alınanların 19 minə qədəri partiya üzvüdür. Onların da 14 mini bir partiyaya-hakim YAP-a, qalan 5 min nəfər isə 30 partiyaya mənsubdur.

«Panorama» verilişində Azərbaycanda Vətəndaş Cəmiyyətinin İnkişafına Yardım Assosiasiyasının nümayəndəsi Məhərrəm Zülfüqarlı YAP-ın üstünlüyünü bir sıra amillərlə izah edib. Onun fikrincə, hər şeydən əvvəl müxalifət partiyaları zəifdir. Başqa tərəfdən, Seçki Məcəlləsi partiya siyahılarından seçkiyə qatılmanı xeyli çətinləşdirir.

Məhərrəm Zülfüqarlı deyir ki, YAP maliyyə və inzibati imkanlarından istifadə edərək çətinlikləri asanlıqla dəf edə bilər. Üstəlik, o hesab edir ki, yerlərdə müxalifət üzvlərinə yaradılan çətinliklər də YAP-ı şəksiz qalibə çevirir:

«Ancaq mən bütün təzyiqlərə görə yalnız hakimiyyəti qınamaq istəməzdim. Gərək vətəndaşlar da fəal olsunlar və öz hüquqları uğrunda axıra kimi mübarizə aparsınlar…».

Seçki Monitorinqi və Demokratiyanın Tədrisi Mərkəzinin üzvü Bəşir Süleymanlı isə sadə insanlarda bir elə də günah görmür:

«Bu insanlar neçə ildir seçkilərə qatılıb öz namizədlərini verirlər. Ancaq görəndə ki, seçki yolu ilə heç nəyi dəyişmək olmur, ruhdan düşürlər. Təzyiqlərin, repressiyaların qarşısını hakimiyyət ala bilər. Ancaq mən bu istiqamətdə hər hansı bir addım görmürəm».

Bəşir Süleymanlı düşünür ki, bələdiyyə seçkilərində təzyiqlərlə bağlı sifariş mərkəzdən gəlir. Məqsəd həm parlament seçkiləri ərəfəsində müxalifətin güclənməsinə yol verməmək, həm də arzuedilməz şəxslərin seçilməsinin qarşısını almaqdır.

Məhərrəm Zülfüqarlı isə təzyiqlərlə bağlı yuxarı orqanlardan sifariş verilməsini istisna etməsə də, başlıca günahı yerli məmurlarda görür:

«Ola bilsin, yuxarıdan deyirlər ki, saçın kəpəyini və ya saçın özünü azaldın. Ancaq yerli məmurlar saç əvəzinə baş kəsirlər…».

Buna da bax:

Şərhləri göstər

XS
SM
MD
LG