Keçid linkləri

2016, 07 Dekabr, çərşənbə, Bakı vaxtı 14:43

Nobel Mükafatı üç fizika alimi arasında bölündü


Çarlz Kao, Uillard Boyl və Corc Smit

Çarlz Kao, Uillard Boyl və Corc Smit

Oktyabrın 6-da İsveçdə üç alim fizika sahəsində Nobel Mükafatı alıb. Onlar fiber-optik naqillər və rəqəmsal fotolarda istifadə olunan texnologiya üzərində işlərinə görə həmin mükafata layiq görülüblər.

Nobel Mükafatı məbləğinin yarısı Çin əsilli Britaniya və ABŞ vətəndaşı olan Çarlz Kaoya verilib.

Mərasimdə qeyd edilib ki, Kao fiber-optik sahədə yeni bir çığır açıb, onun hazırladığı üsulla nazik bir boru ilə rəqəmsal informasiyanı daha uzaq məsafələrə ötürmək mümkün olur.

Mükafatın qalan yarısı isə amerikalı Corc Smit və həm ABŞ, həm də Kanada vətəndaşlığı olan Uillard Boyl arasında bölünüb. Onlar rəqəmsal kameralarda istifadə olunan və görüntünü rəqəmlərə çevirən cihazın ixtira edilməsinə görə həmin mükafatı alırlar.

İsveçdə Elmlər Akademiyasında Fizika üzrə Nobel Komitəsinin rəhbəri Cozef Nordqren deyib ki, bu alimlərin hər üçü müasir şəbəkə cəmiyyətinin formalaşmasına birbaşa kömək ediblər:

- Bu gün mükafata layiq bilinən işlərin real nəticəsini demək olar ki, hamı hər gün görür. Mən kommunikasiya işlərini, şəkillərin asanlıqla rəqəmlərə çevrilməsini nəzərdə tuturam. 20 il əvvəl belə şeyləri görmək mümkün deyildi.

Fizika üzrə Nobel Mükafatı 10 milyon İsveç kronu – təxminən 1.12 milyon manatdır.

Sabah da kimyaçılar arasında Nobel Mükafatının qalibi elan ediləcək.

Günün bütün mövzuları

Şərhləri göstər

XS
SM
MD
LG