“Bakı-Xəbər” qəzetindəki “Azərbaycan iqtisadiyyatında xarici investisiyanın həcmi azalır” başlıqlı məqalədə bildirilir ki, aparılan hesablamalara görə, Azərbaycana xarici investorların yatırdığı kapitalın həcmi indi azalan xətt üzrə inkişaf edir. Dövlət Statistika Komitəsinin sədri Arif Vəliyevin sözlərinə görə, ölkə iqtisadiyyatına 2006-cı ilin ilk 6 ayı ərzində 2,6 milyarda yaxın yeni Azərbaycan manatı investisiya qoyulub. Bu isə, ötən ilin müvafiq dövrü ilə müqayisədə, əcnəbi investisiyanın həcminin 7,7 faiz azalması deməkdir. Mütəxəssislər belə hesab edir ki, xarici investisiyaların həcminin azalan xətt üzrə inkişaf etməsi son nəticədə bütöv investisiyanın həcminin azalmasına gətirib çıxaracaq. Cari ilin əvvəllərindən etibarən xarici investisiyaların həcminin azalmasının səbəblərinə gəlincə, bu, daha çox bir sıra əcnəbi şirkətlərə qarşı hökumətin nümayiş etdirdiyi sərt mövqedən sonra ölkənin investisiya mühitinə ciddi zərbə dəyməsilə izah olunur.
“Şərq” qəzetindəki “Müxalifətin süstlüyü” başlıqlı məqalədə müəllif müxalifət düşərgəsində müşahidə olunan passivliyin səbəblərini araşdırıb. Müəllif yazır ki, düşərgənin təmsilçiləri bunu yayın gəlişi, iqtidarın təzyiqləri ilə əlaqələndirsələr də, bu səbəblər o qədər də inandırıcı görünmür. Politoloq Cümşüd Nuriyev də süstlüyün yay fəsli ilə izah olunmasının əleyhinə çıxış edib. Onun dediyinə görə, Azərbaycan müxalifətinin belə bir vəziyyətə düşməsi parlament seçkilərindən sonra baş verib. Politoloq Rauf Mirqədirov isə müxalifətin süstlüyünün obyektiv səbəbləri olduğunu söyləyib. O, seçkidən sonra məğlub olmuş müxalifətin öz sıralarına baxış keçirdiyini deyib.
“525-ci qəzet”də bildirilir ki, Azərbaycana səfərini başa vurub Yerevana gedən Avropa Birliyinin Cənubi Qafqaz üzrə xüsusi nümayəndəsi Piter Semnebi dünən Ermənistan rəhbərliyi ilə danışıqlar aparıb. Ermənistan prezidentinin Mətbuat Xidmətinin məlumatına görə, cənab Semnebinin dövlət başçısı Robert Köçaryanla görüşündə Ermənistan- Avropa Birliyi münasibətləri müzakirə olunub. Tərəflər həmçinin regional münasibətlər və Dağlıq Qarabağ münaqişəsinin tənzimlənməsi istiqəmətində fikir mübadiləsi aparıblar. P.Semnebi deyib ki, Avropa Birliyi Azərbaycan və Ermənistan arasında Dağlıq Qarabağ münaqişəsinin nizamlanmasıyla bağlı hələ də razılıq əldə olunmamasından təəssüflənir. Onun sözlərinə görə, Avropa Birliyi danışıqlar prosesində birbaşa iştirak etməsə də, Avropa «Qonşuluq Siyasəti» çərçivəsində tərəflər arasında qarşılıqlı inamın yaranmasına kömək göstərməyə hazırdır. Bununla yanaşı, finlandiyalı diplomat danışıqlar prosesinin formatının dəyişdirilməsinə əsas görmədiyini də vurğulayıb.
“Ayna” qəzetinin əməkdaşı ilə söhbətində Azad İstehlakçılar Birliyinin sədri Eyyub Hüseynov ilin sonuna qədər kənd təsərrüfatı məhsullarının bir qədər də bahalaşacağını proqnozlaşdırdığını bildirib. “Bizim hesablamalarımız göstərir ki, ilin sonuna qədər kənd təsərrüfatı məhsullarının qiyməti ən azı 50 faiz bahalaşacaq. Biz təklif edirik ki, hökumət ət və ət məhsulları, eləcə də toyuğun qiymətinin ucuzlaşdırılması istiqamətində addımlar atsın. Çünki bu məhsullara xərclənən vəsait doğrudan da sıravi vətəndaşın büdcəsinin böyük hissəsini təşkil edir”, - deyə Eyyub Hüseynov bildirib. Kənd Təsərrüfatı naziri İsmət Abbasov isə bildirir ki, bahalaşmanın qarşısını almaq üçün Bakının inzibati rayonlarında mütəmadi olaraq yarmarkalar təşkil ediləcək. Onun sözlərinə görə, nazirliyin nümayəndələri Bakıya yaxın rayonlara təhkim olunub və onlar kənd sakinlərinin öz məhsullarını paytaxt yarmarkalarında satması üçün yerli rəhbərliyin imkan yaratmasına nəzarət edirlər. Müvafiq icra strukturlarının yaradacağı imkanın nədən ibarət olmasına gəlincə, cənab Abbasov “onlar kənd sakinlərinin Bakıya gəlib-getməsi üçün nəqliyyat ayırmaqla yanaşı, məhsulun yarmarkalarda yerləşdirilməsinə şərait yaradırlar” deyib. İqtisadi Tədqiqatlar Mərkəzinin eksperti Azər Mehtiyev isə hesab edir ki, alternativ bazarların, yəni yarmarkaların təşkili müvəqqəti xarakter daşıdığından atılan addımın təsiri də müvəqqəti olacaq.