“525-ci qəzet”in əməkdaşı bu gün Parisdə ATƏT Minsk Qrupu həmsədrlərinin Azərbaycan və Ermənistanın Xarici İşlər nazirləri Elmar Məmmədyarov və Vardan Oskanyanla keçiriləcək görüşünü şərh edib. Azərbaycan Xarici İşlər Nazirliyinin Mətbuat və İnformasiya Siyasəti İdarəsinin rəisi Tahir Tağızadənin bildirdiyinə görə, görüşün təşəbbüskarı Minsk “üçlüyü”dür və vasitəçilər nazirlərlə sülh prosesində yaranmış vəziyyəti müzakirə etmək niyyətindədirlər. Müəllifin fikrincə, vasitəçilərin Buxarest danışıqlarından bir həftə sonra Xarici İşlər nazirlərini bir araya gətirməsi ona işarədir ki, onlar sülh prosesinin dalana girə biləcəyindən ciddi narahatdır və yaxın aylarda heç olmasa bu ilin sentyabrında gözlənilən MDB sammiti çərçivəsində prezidentlərin daha bir görüşünə nail olmaq istəyirlər.
“Bakı-Xəbər” qəzetinin əməkdaşı yazır ki, uzun müddətdir ki, dövlət başçısının, ilkin olaraq, Misir Mərdanovu könüllü istefaya göndərəcəyi gözlənilir. Lakin real vəziyyətdə İlham Əliyevin bu məsələdə qarşısını kəsən əsas amil Təhsil nazirinin mənsub olduğu regiondur. Keçmiş Səhiyyə naziri Əli İnsanovun dövlət çevrilişində ittiham edilərək həbsə alınmasından sonra, onsuz da əslən Ermənistandan olanların böyük əksəriyyəti hakimiyyətdən narazı qaldıqlarını gizlətmir. Misir Mərdanovun da yaxın zamanda istefaya göndərilməsi, ekspertlərin rəyincə, həmin regiondan olanların hakimiyyətə qarşı daha aktiv mövqedən çıxış etməsinə gətirib çıxaracaq.
“Ayna” qəzeti xəbər verir ki, Azərbaycanın işğal olunmuş ərazilərində təbii sərvətlərin istismar olunması məqsədi ilə xarici şirkətlərin investisiya qoyuluşu artıb. Ekologiya və Təbii Sərvətlər Nazirliyinin Mətbuat Xidmətindən verilən məlumata görə, təkcə 2001-2003-cü illərdə separatçı “Dağlıq Qarabağ Respublikası”nın iqtisadiyyatının dirçəlməsinə 35 mln. dollar məbləğində investisiya qoyulub. Bu məbləğin 25 mln. dolları xarici, 5 mln. dolları isə Ermənistanın və bu qədər də Qarabağda yaşayan iş adamlarının payına düşür. Hazırda ABŞ, Kanada, Fransa, Avstraliya, İsveçrə, Livan, Rusiya və Ermənistanda yaşayan Qarabağ erməniləri tərəfindən Dağlıq Qarabağa investisiyalar daxil olmaqdadır.