Keçid linkləri

logo-print
2016, 05 Dekabr, Bazar ertəsi, Bakı vaxtı 16:36

ABŞ immiqrantları orduya cəlb edir


Bu il pilot proqramla ilk dəfə məhdud sayda - cəmi 1000 nəfər imiqrantın orduya yazılmasına imkan veriləcək

Bu il pilot proqramla ilk dəfə məhdud sayda - cəmi 1000 nəfər imiqrantın orduya yazılmasına imkan veriləcək

Amerika ordusu bu ölkədə müvəqqəti viza ilə yaşayanlara altı ay müddətində vətəndaşlıq vəd edir. Bu yaxınlarda icrasına başlanacaq pilot proqrama görə, könüllü orduda qulluq edən immiqrantlar xidmətlərinin ilk günündə vətəndaşlıq üçün müraciət edəcəklər.

Altı ay ərzində isə onlar vətəndaşlıq andı içib ABŞ vətəndaşı olacaqlar. Ordu bu cür könüllü immiqrantları vətəndaşlıq müraciəti üçün lazım olan 675 dollarlıq ödənişdən də azad edir.

Bu proqram «green kart» deyilən sənədlə azı iki il ABŞ-da yaşayan immiqrantlara aiddir. Amma «The New York Times» qəzetinin yaydığı xəbərə görə, ABŞ-da oxuyan tələbələr və qaçqınlar da bu proqramla vətəndaş olmaq üçün könüllü orduya yazılmağa müraciət edə biləcəklər.

Nyu-Yorkdan başlanacaq pilot proqramla 550 nəfər immiqrantın orduya qəbul edilməsi nəzərdə tutulur. Könüllülərin orduya lazım olan 35 dildən birini və ya ikisini bilmələri tələb olunur. Bunların arasında ərəb, çin, hindi dilləri də var. Bundan başqa, ölkənin hər yerindən də 300 nəfər könüllü tibb işçisinin orduya qəbul olunması planlaşdırılır.

Ordu rəhbərliyi bir çox amerikalıdan daha təhsilli, bacarıqlı və bir neçə dil bilən immiqrantların imkanlarından tibbi yardım, tərcümə, kəşfiyyat təhlilləri kimi sahələrdə istifadə etmək niyyətindədir.

Bu il pilot proqramla ilk dəfə məhdud sayda - cəmi 1000 nəfər immiqrantın orduya yazılmasına imkan veriləcək.

Pentaqon rəhbərliyi proqramı uğurlu hesab etsə, gələcəkdə vətəndaş olmaq istəyən daha çox könüllü immiqrantın orduya qəbuluna imkan veriləcək.

Şərhləri göstər

XS
SM
MD
LG