Keçid linkləri

2016, 08 Dekabr, Cümə axşamı, Bakı vaxtı 16:29

Çavesin reallaşan zarafatı


Hüqo Çaves deyir ki, sosialist inqilabını başa çatdırmaq niyyətindədir

Hüqo Çaves deyir ki, sosialist inqilabını başa çatdırmaq niyyətindədir

Azərbaycan hakimiyyətinin martda etmək istədiyini Venesuela hakimiyyəti bu bazar etdi-prezidentlik müddətlərinə qoyulan məhdudiyyəti referendumla götürdü. İndi neft ölkəsi Venesuelada nə qədər istəyirsən prezident ola bilərsən.

İkinci prezidentlik müddəti 3 ilə bitəcək Hüqo Çaves bildirib ki, ondan sonra da hakimiyyətdə qalmaq istəyir, çünki sosialist inqilabını başa çatdırmaq niyyətindədir.

Referendumun nəticəsini Hüqo Çaves sosialist islahatlarını davam etdirməyə xalqın mandatı adlandırıb. O deyib ki, xalq sosializmə və inqilaba «hə» dedi. Buna görə yaxın on illərdə sosialist islahatları intensivləşəcək.

Referendumun nəticəsinin yaxın illər üçün həlledici olması ilə müxalifət də razıdır, ancaq başqa səbəbdən. Müxalifət deyir ki, referendumun bu nəticəsi ölkəni hakimiyyət acı olan avtokratın diktatorluğuna aparacaq. Bunu «Assoşieyted press» yazır və xatırladır ki, 10 il əvvəl prezident seçilən Çaves hələ onda demişdi ki, hakimiyyətdə 2049-cu ilə - 95 yaşı olana kimi qala bilər. O vaxt buna zarafat kimi baxırdılar.

Vaşinqtondakı İnter-Amerikan dialoq adlı təhlil mərkəzinin təhlilçisi Maykl Şifter agentliyə deyib ki, Çavesin məqsədi aydındır: o, ömürük prezidentliyə gedir. Ancaq təhlilçinin fikrincə indiki qlobal böhran buna imkan verməyə də bilər. Venesuelanın ixracının 94 faizi neftin payına düşür. Neftin qiyməti belə aşağı olsa, ictimai pulu xərcləmək hesabına populyarlığını belə qaldırmaq ona çətin olacaq. Venesueladakı pulsuz təhsili, tibb sistemini, hökumətin evlə təminat sxemini maliyyələşdirmək üçün neftin bareli gərək 60 dollar ola. Üstəlik indi ölkədə inflyasiya 31 faizdir, bu da neft gəlirlərini yeyir.

Maraqlıdır ki, müxalifətin Venesueladakı iradları isə elə Azərbaycandakı kimidir. Müxalifət prezidenti dövlətin resurslarından öz xeyrinə istifadə etməkdə günahlandırır. Deyir ki, büdcə təşkilatlarında işləyən 2 milyon seçiciyə təzyiqin və onların səslərinin hesabına prezident qalib gəldi. Dövlətin bütün televiziyalarını məcbur edirdilər ki, onların hamısı tez-tez Çavesin çıxışlarını versinlər. Məhkəmələr, qanunvericilik və seçki şurası - hamısı prezidentin nəzarətindədir. Hətta Venesuela rəsmilərinin özləri «Assoşieyted press»ə deyirlər ki, Çavesi dayandırmaq mümkün deyil.

Venesuelanın müxalifət lideri Omar Barboza isə deyir ki, bunun axırı diktatorluq olacaq – hakimiyyət bölgüsü olmayacaq, bütün hakimiyyət bir əldə cəmləşəcək, dövlətin resurslarını hakimiyyət istədiyi kimi istifadə edəcək.

Günün bütün mövzuları

Şərhləri göstər

XS
SM
MD
LG