«Azadlıq» qəzetinin əməkdaşı Aqil Xəlilin Fransada qala bilməsi üçün vizasının müddəti daha 6 ay müddətinə uzadılıb.
Bu barədə «Azadlıq» radiosuna A.Xəlilin özü məlumat verib.
Jurnalist deyir ki, hələlik Azərbaycana qayıtmaq fikrində deyil. Onun sözlərinə görə, bir az sakitçilik yaranandan sonra ölkəyə qayıdacaq.
Jurnalist Bakı ilə müntəzəm əlaqə saxlayır və ona hələ ki, Fransada qalmağı məsləhət görüblər. Ona Fransada qalmaq və dil öyrənmək üçün hər cür şərait yaradılıb.
«Azadlıq» qəzetinin əməkdaşı Aqil Xəlil 2008-ci il iyulun 24-də «Sərhədsiz reportyorlar» beynəlxalq jurnalist təşkilatının xüsusi dəvəti ilə Fransaya gedib. Onun ölkədən getməsi Fransa və ABŞ-ın Bakıdakı səfirliklərinin səyləri nəticəsində mümkün olub.
A.Xəlilin həyatına bir neçə dəfə sui-qəsd edilib, ürək nahiyəsindən bıçaqlanıb. Respublika Prokurorluğu ona homoseksualların hücum etdiyini bildirib. Jurnalist isə istintaqın gəldiyi nəticəni qurama adlandırır və peşə fəaliyyətinə görə, təqib olunduğunu deyir.