Bu il yanvarın 9-da Nardaran qəsəbəsində keçirilən piket zamanı çıxış edənlərdən birinin Milli Məclisinin deputatı, xalq şairi Sabir Rüstəmxanlını öldürmək barədə dediyi fikirlərlə bağlı cinayət işi başlanıb.
Bu barədə Daxili İşlər Nazirliyinin mətbuat xidmətindən bildirilib. Məlumata görə, bununla bağlı Sabunçu rayon Polis İdarəsi tərəfindən Cinayət Məcəlləsinin öldürməklə və ya sağlamlığa ağır zərər vurmaqla hədələmə maddəsi ilə cinayət işi başlanıb. Araşdırmalar aparılır.
Yanvarın 9-da Nardaran qəsəbəsindəki «İmam Hüseyn» meydanında İsrailin Fələstində həyata keçirdiyi hərbi əməliyyatlara etiraz əlaməti olaraq keçirilən aksiyada kənd sakini Hacı Əli Hüseynov Nardaran ağsaqqallarından birinin millət vəkili Sabir Rüstəmxanlının barəsində ölüm fitvası verdiyini bildirib. O, bunu xalq şairinin İranın «Səhər» kanalına qarşı səsləndirdiyi fikirlərlə əlaqələndirib.APA
