Müxalifətdə olan "Azadlıq" blokunun keçirdiyi xatirə mərasimində isə hökumətdən 88 il əvvəl Azərbaycan xalqına vurulan maddi və mənəvi zərərin Ermənistandan alınması üçün hüquqi-siyasi tədbirlər görməsini tələb edən bəyanat qəbul olunub. Milli Birlik Hərəkatının təmsilçisi Elxan Abbasov deyir ki, "Azadlıq" bloku 1918-ci ilin Bakı hadisələrinə beynəlxalq təşkilatların münasibətini də bu məsələyə ikili standartlarla yanaşma kimi qiymətləndirir.
Azərbaycan tarixçiləri 1918-ci ilin martında Azərbaycanın Bakı, Şamaxı, Quba, Naxçıvan, Zəngəzur və digər bölgələrində erməni hərbi birləşmələrinin azərbaycanlılara qarşı xüsusi amansızlıqla qətllər törətdiyi, yalnız üç gün ərzində – martın 29-dan 31-dək təkcə Bakı və Şamaxıda 30 mindən çox insanın öldürüldüyünü yazırlar.
Bir neçə il əvvəl isə Azərbaycan hökumətinin qərarı ilə hər il martın 31-i Azərbaycanlıların soyqırımı günü kimi tanınıb. ABŞ, Rusiya və azərbaycanlıların toplu şəkildə yaşadıqları başqa ölkələrdə də bu hadisələrlə bağlı anma mərasimləri keçirilib.