«Biz bu müzakirələri müşahidə edirik və Azərbaycan hökumətini dəvət edirik ki, bu təkliflə bağlı müxtəlifyönümlü və açıq debatlar üçün münbit şəraiti təmin etsin. Bununla da istənilən fikir sahibi öz düşüncələrini bildirməyə imkan qazansın. Demokratiya üçün vacib olan yalnız konstitusional prosedurları idarə edən qanunlar deyil, daha vacibi sağlam demokratik mühitin yaradılmasıdır ki, bu da vətəndaşları öz hüquqlarından məhdudiyyətsiz istifadə etməyə sövq etsin»-, ABŞ Səfirliyinin İctimaiyyətlə Əlaqələr şöbəsinin rəhbəri Terri Devidson Azərbaycan Konstitusiyasına dəyişiklik edilməsi məsələsinə münasibət bildirib.
Diplomat fikrini davam etdirərək deyib: «Biz siyasi rəqabəti və hakimiyyətin dinc yolla, konstitusiyaya uyğun dəyişilməsini demokratiyanın təməl prinsipi və demokratik proseslərin, təsisatların güclənməsi kimi dəyərləndiririk. Nəticə etibarı ilə biz Azərbaycan hökumətini dəvət edirik ki, ölkənin uzun müddətli sabitliyi və firavanlığı üçün vacib olan sərbəst toplaşmaq, təşkilatlanmaq və söz azadlığı kimi dəyərlərə tam cavab verən demokratik islahatların sürətini artırsın. Amerika Birləşmiş Ştatları bu yöndə islahatların keçirilməsində Azərbaycanın gördüyü işi dəstəkləməyə hazır olduğunu bildirir»-, Terri Devidson bildirib.
Azərbaycan parlamenti Konstitusiyaya əlavələr layihəsinə rəy almaq üçün Konstitusiya Məhkəməsinə göndərib. Məhkəmə dekabrın 24-də məsələyə rəyini açıqlayacaq. Dekabrın 26-da isə referendum aktı parlamentdə müzakirəyə çıxarılacaq. Bir nəfərin iki dəfədən artıq prezident seçilməsinə konstitusiya qadağasının ləğv edilməsinin də yer aldığı təşəbbüsü hakim Yeni Azərbaycan Partiyası irəli sürüb.
Avropa Şurası və ATƏT-dən isə hələlik bu layihəyə hər hansı reaksiya yoxdu. ATƏT-in Bakı ofisindən «Azadlıq» radiosuna verilən məlumata görə, hələlik qurumdan hər hansı reaksiya gözlənilmir. Avropa Şurasından da eyni cavabı veriblər.
