Keçid linkləri

2016, 08 Dekabr, Cümə axşamı, Bakı vaxtı 08:14

«Şəhər nəqliyyatı iflic olacaq»


«Onsuz da bütün günü tıxacdı, indi 3-4 qat artacaq»

«Onsuz da bütün günü tıxacdı, indi 3-4 qat artacaq»

Dekabrın ilk günündə Bakıda işıqforların, liftlərin işləmədiyini, blokların, parkların qaranlığa qərq olduğunu görsəniz, təəccüblənməyin. Səbəb Bakı Şəhər İcra Hakimiyyəti (BŞİH) Mənzil-Kommunal Təsərrüfat Departamentinin «Bakıelektrikşəbəkə»yə xeyli borcunun yığılmasıdır. «Bakıelektrikşəbəkə»nin sözçüsü Tanrıverdi Mustafayev:

«Bakı Şəhər İcra Hakimiyyəti Mənzil-Kommunal Təsərrüfat Departamentinin «Bakıelektrikşəbəkə»yə 12 milyon manat borcu yığılıb. Dekabrın 1-dək vaxt verilib. Əgər borc ödənməsə, işıqforların, liftlərin, blokların elektrik enerjisi kəsiləcək».

BŞİH-in sözçüsü Nuranə Mərdanova isə «Azadlıq» radiosuna deyir ki, sözügedən məbləğ olduqca böyükdür, söhbət meriyanın yalnız bir departamentindən gedə bilməz:

«Bakı Şəhər İcra Hakimiyyəti bəlkə bir neçə yüz manat borcludur. Bunlar meriyanın bütün strukturlarını və idarələrini nəzərdə tuturlar. Bakı Şəhər İcra Hakimiyyətinin borcu var demək düzgün deyil, bizim o qədər idarəmiz var ki…»

Bakı sakinləri ilə deyirlər ki, işıqforlara elektrik enerjisinin nəqli dayandırılsa, şəhər nəqliyyatı iflic olacaq:

- Onsuz da bütün günü tıxacdı, indi 3-4 qat artacaq.

- Bütün şəhər iflic olar. İndi sürücülərdə nəqliyyat mədəniyyəti yoxdur. Aləm bir-birinə dəyəcək.

- Bizim sürücülər belə ekstremal durumlara öyrənib. Özləri çıxış yolu tapacaqlar.

- Şəhərdə gəzmək mümkün olmaz.

- Gör işıq necə bahadır ki, Bakı Şəhər İcra Hakimiyyəti pulu ödəyə bilmir. Bəs, bu kasıb camaat necə ödəsin?

Söhbətləşdiyimiz sakinlərin çoxu BŞİH-in balansında olan liftlərdən xeyli gileyləndilər. Dedilər ki, «Bakıelektrikşəbəkə» işığı kəsdi-kəsmədi, onsuz da lift işləmir.

Ancaq sakinlər onu da deyirlər ki, liftlər pis işləsə də, «Bakıelektrikşəbə»nin liftlərin və blokların işıqlarını kəsəcəyi sevindirici xəbər deyil. Xüsusən yaşlı əhali üçün:

- Uşaqlar liftdə qala bilər. Yaşlı insanlar üçün çətin olacaq. Heç olmasa orta mərtəbələrdən birinə qalxır lift.

- Mən yuxarı mərtəbələrə liftsiz qalxa bilmirəm. Bu, çıxış yolu deyil axı. Başqa yol tapsınlar.

«Bakıelektrikşəbəkə» isə bildirir ki, qurum bütün müştərilərə eyni gözlə baxır. Əgər dekabrın 1-dək meriya pulu ödəməsə, işıqlar mütləq kəsiləcək.

Şərhləri göstər

XS
SM
MD
LG